971/2024-2025

Aizawl, 27^th June, 2024 : MGNREGS hnuaia hmalakna thar “Project Rotling – Hmasawnna Rahbi Thar” chu Rural Development minister Prof. Lalnilawma’n MLA Conference Hall, Annexe Building, Treasury Square-ah a tlangzarh a, hetih rual hian he project vil zuina tur portal leh MzSRLM hnuaia Self-Help Group te hlawhtlinna lehkhabu a tlangzarh bawk a ni.

Prof. Lalnilawma chuan he hunah hian thu sawiin “Project Rotling – Hmasawnna Rahbi Thar” hi thawhhona tha tak hnuaiah kalpui tur chi a ni a, hmalakna thar “Pilot Project” a nih vangin project thar hmalakna tur atana thlan chhuahte chu entawntlaka hlawhtlinpui ngei a ngai a ni a ti a. Kan hlawhtlin chuan hun lo kal zel turah pawh chhunzawm a phurawm dawn a, State dang te pawhin an rawn entawn a, an rawn zirchian tlaka thawh a tul tih sawiin documentation chungchangah pawh fimkhur tak leh kimchang taka hma la turin a thawktu tur officialte leh khawtlang hruaitu village council te a chah bawk a ni.

Minister chuan he project hi awm lo ata rawn awm thar a nil ova, awmsa ata mumal leh tangkai zawka hmalakna tur a ni a ti a. MGNREGS hnuaia hmalakna kal mek bakah a tha lehzual a, danglamna thlen tura ke penna a ni tih a sawi a. Hun tlemte chauh kan in pek laia project tha tak tak 84 lai mai RD Block 28 atanga a lut thei hian officialte theihna leh thiamna a pho chhuak hle tih sawiin fakawm a tih thu a sawi a ni. He project hi thawhhona tha hnuaia hlawhtling tur a nih thu sawiin department hrang hrang atanga official pawimawh lo kalte pawh theihtawp chhuaha an tel ve theihna project ah chuan phur leh that ho taka tel turin a sawm bawk a ni.

“Project Rotling – Hmasawnna Rahbi Thar” hi Mizoram chhunga RD Block 28 te inelna a ni a, he project hnuaiah hian Short Term Project (kum 1 chhunga thawh zawh tur), Medium Term Project (kum 2/3 chhunga thawh zawh tur) leh Long Term Project (kum 5 chhunga thawh zawh tur) a ni a, RD Block 28 atangin concept paper 84 a lut a, hengte hi District tinah a bialtu Project Director ten an endik hnuah State-Level Expert Panel in project 27 an thlang chhuak a, heta tang hian RD Minister kaihhruai State-Level Monitoring Committee in project 15 ah an lo thlifim leh a ni.

Short Term Project hnuaiah hian Project 5 thlanchhuah a ni a, chungte chu :

1. Lunglei RD Block – Overall Sustainable Development at Sairep Village

2. Khawbung RD Block – Project Sustainable Livelihood through Ericulture at Chingzawl Ram

3. Reiek RD Block – Green Tourism & Clean Energy at tourism Village Reiek & Ailawng (Integrated Watershed Development for Tlawng River Rejuvenation)

4. Bilkhawthlir RD Block – Construction of Arecanut Plate Making and Market Building at Bilkhawthlir South Village

5. Lawngtlai RD Block – Water Conservation-cum-Soil Erosion Control at Tuiphal River, Chandmary Village

Medium Term Project hnuaiah hian Project 5 thlanchhuah a ni a, chungte chu :

1. West Phaileng RD Block – Multipurpose Mega Pond

2. Siaha RD Block – Common Facility Center (CFC) at Kawlchaw East Village

3. Khawzawl RD Block – Empowering Job Card Holders through Banana Cluster Cultivation at Rabung, Khualen & Aiduzawl Villages

4. Phullen RD Block – Ginger Processing Unit

5. Khawbung RD Block – Preparation of Productive Vegetable Farm at Buhtang Zawl and Khiangpui Zawl, Bungzung

Long Term Project hnuaiah hian Project 5 thlanchhuah a ni a, chungte chu :

1. Hnahthial RD Block – Comprehensive Sustainable Cluster Farming at Hnahhriphai Zau

2. Kawrtethawveng RD Block – Construction of Rainwater Harvesting Tank/Concrete Pond (1.5-1.8 litres) at Kawrtethawveng Tennis Court

3. Reiek RD Block – Mission Reiek Turmeric; The Golden Spice of Mizoram (Cluster Turmeric Cultivation, Processing and Market Chain Development; An Integrated Development of Tlawng Watershed Area Under Reiek RD Block)

4. Siaha RD Block – Sustainable and holistic Development of Agricuklture & Allied at Lobo (Lungbun) Village

5. Thingdawl RD Block – Value Addition of Arecanut in Thingdawl (Boosting Forward Linkage and Improving the Socio-Economic Status of Rural Farmers)

Heng project thlanchhuahte hnenah hian sum hman tur first installment a semchhuak nghal a ni.

“Project Rotling – Hmasawnna Rahbi Thar” hawnna inkhawm ah hian Pu R. Zarzosanga, Commissioner & Secretary chuan inlawmna thu a sawi a, RD Department Joint Secretary Pu Paul L. Khuma’n report pe in Project winner te a puang a, W. Chhuanawma, Dy. Govt. Chief Whip pawhin thuchah sawiin, Expert Panel Member Dr. James LT Thanga, Associate Professor, MZU in fuihna thu a sawi a, Pu Lalvenhima, Dy. Secretary, RD in lawmthu sawina hun hmangin a khar a ni.