74/2025-2026

Dated Serchhip, the 7^th April, 2025: Vawiin khan Serchhip P&E Venga Rural Development Department, Serchhip RD Block Office Building thar chu RD Minister Prof Lalnilawma chuan a hawng a. BDO Office Building thar Conference Hall ah Office thar hawnna inkhawm hman zui nghal a ni.

Khuallian Prof Lalnilawma chuan thusawiin, sawrkar hnathawkten kan hun tam ber kan hmanna kan Office chu a building a chhia emaw a tha emaw a nuam tur a ni a, kan chhuang bawk tur a ni, a ti. Office building thar leh mawiah duhtawk mai lovin, a thawktute pawhin Zonun Zemawi-Hawihhawmna nen tha taka hna thawk turin a sawm. Office hna chuan hmasawnna tha leh duhawm, thingtlang lam leh ram mipuite tan thlen ngei se a duh thu sawiin, thawktuten phurna thar nen an phak ang tawk theuhah theitawp chhuah thar theuh turin a sawm bawk a ni. 

Tunlaia tuihna tlem zel tih ziaawmna turin Sarovar 2.0 programme hnuaiah chak taka hmalak mek a nih thute, mi rethei in sak tanpuina PMAY scheme kaltlanga hmalak mek a nih thu leh Rural E-Library changtlung nei turin hmalak mek a nih thute a sawi a. Serchhip chu sawrkar hnathawk tha tak tak leh sawrkar hmunhma hrang hrang tha tak tak an neih avangin an vanneih thu sawi bawk a ni. 

He hunah hian RD Additional Secretary Pu V. Lalengmawia, RD Director Pu K. Lalrohlua leh Serchhip Bawrhsap Pu Paul L Khuma ten thu a sawi bawk a ni.

Serchhip BDO Office Building thar hawnnaah hian Serchhip BDO leh Project Director, DRDO Serchhip Dr. Malsawmtluanga Fanchun chuan inlawmna thu a sawi a, Pi C Remsangpuii, Technical  Assistant chuan Building sak dan (Technical Report) tlangpui pein, he Panchayat Bhavan cum Block Development Office hi MGNREGA Material Component atangin, Rs. 2,24,55,000 (Nuaih zahnih sawmhnih pali, singnga sangnga) senga sak niin, April ni 7, 2024 khan sak tan a ni a, kumin April ni 7, 2025 hian sak zawhfel niin hawn a nih thu a sawi. He building hi Mizoram Technocraft Company Pvt. Ltd. sak niin thla 12 chhung  an sa a ni. Building pumpui hi Sq ft 7082 a zau a ni a. Chhawng li niin, a chhawng hnuai ber (basement) hi Office Canteen leh chowkider Qrts tur a ni a, Ground floor hi BDO, Establishment  staff leh   MzSRLM staff te awmna tur niin 1st Floor hi MNREGA Staff te awmna tur a ni a, a chung ber hi Confenrence Hall atan hman a ni ang.

Pu MC Zirsangliana, Asst. Programme Officer (MGNREGA) chuan Power point presentation hmangin Serchhip RD Block hnathawh tawh leh hmalakna kalmek te Report  a pe a, Serchhip RD Block hian PMAY(G) scheme hnuaiah  mi rethei in sak tanpuina chhungkaw 525 pe tawhin, Ni Za inhlawhna – MGNREGA   hnuaiah khaw 44 an enkawl a, Job Card   Holder 12746 an awm mek bawk a ni.

He hun hi Pu Stephen Laltlansanga Auhmun, ARDO DRDO chuan kaihruaiin Serchhipa sawrkar department hrang hrang hotute, MJA memberte leh tlawmngai pawl aiawhte an tel a. Pi Zorengpuii, Extension Officer chuan lawmthu sawiin hun a khar a ni.