2473/2025-2026

AIZAWL; the 2nd December,2025: Minister Prof.Lalnilawma RD&A, PHE leh DM&R Deptt., changtu leh Tawi bialtu MLA ni bawk in a bial chhung Seling a YMA Hall kalkawng leh Thingsul-Tlangnuam a Futsal ground hawnna neih pahin Prof.Lalnilawma Futsal Tournament kickoff- na hun neih nghal a, zan lamah Prof.Lalnilawma Volleyball Running Trophy Thingsulthliah Volleyball Court- ah a kickoff-na hun a hmang bawk.

Hawnna leh kickoff programme-ah te hian thu sawiin Minister chuan Mizoram a sawrkar kal tawh te, an sawrkar hun chhung rei ang a an hnathawh en in, ZPM Party kaihhruai Mizoram sawrkar, kum 2 pawh la tling lo hian hna a thawk nasa in a thawk tha hle a ni, tiin Pu Lalduhoma kaihhruaina hnuaiah Minister leh Sawrkar hnathawk te’n mipui tan theihtawp an chhuah a, duhthusam in thil kal duak duak thei lo mahse hmasawnna hnathawh hrim hrim hi a tha thawkhat a, a bikin thingtlang lama kan kuthnathawk te’n rate hresa a sawhthing an ching thei ringawt pawh hi hmasawnna nasa tak a ni, a ti.

Thalai te ruihhlo lakah an fihlim theih nan sawrkar in nasa taka hna a thawh thu sawiin, Minister chuan Kan CM Pu Lalduhoma leh Home Minister Pu K.Sapdanga te’n ramdang atanga ruihhlo leh dan phal loh thil rawn lut tur dan anih theih nan theihtawp an chhuah mek zel a ni tiin, thalai te chu ruihhlo laka an fihlim theih nan an hun awl te hmang tha tura chahin, kohhran leh khawtlang activities-ah in hmang tam turin a fuih bawk. Health Care Scheme chungchang sawiin Minister chuan Mizoram mipui in MUHCS that zia an hre chho mek zel a, he health care scheme hmang tawh apiangin an fak a, miharsa leh rethei te thla timuangtu a ni, a ti. Prof. Lalnilawma chuan Tawi bialtu MLA hi kum 2 pawh ka la ni lova, chumi chhung chuan ka bial chhung khawtinah hian hmasawnna hna (development work) nasa taka thawh a ni, a ti bawk.

Seling YMA Hall kawng sial hna hi Rural Development & Administration Department kaltlang a MGNREGA hmang a thawh a ni a. Thingsul-Tlangnuam Futsal Ground hi Prof.Lalnilawma MLA Fund, MGNREGA leh 15 Finance Commission atanga sum hmuh te hmanga siam niin, Futsal ground-ah hian Sports & Youth Services Department kaltlangin phullem (artificial turf) phah a ni bawk.

Minister Prof.Lalnilawma hi Thingsulthliah BDO Pi.Malsawmhriatzuali leh Sawrkar official dang te’n an tawiawm a ni.