1095/2025-2026

Dated Aizawl, the 8th July, 2025: Vawiin khan Prof. Lalnilawma, Minister, Rural Development & Administration Department kaihhruaiin State Employment Guarantee Council (SEGC) chu Aijal Club-ah an thukhawm.

Minister Prof. Lalnilawma chuan SEGC chu Mahatma Gandhi National Rural Employment Guarantee Act (MGNREGA), 2005 hnuaia hnathawhte endik leh thlirlet hna thawk tura din a nih thu sawiin Department hrang hrang nen tangkawpa mipui leh khawtlang tana tangkai tur hna thawk tur an nih thu a sawi a. Mipuite’n an chhawr tangkai ngei tur hna uluk zawka thlanchhuah leh thawh kawngah State level leh District level-a Convergence Committee-te’n thawhhona tha an neih a pawimawh zia a sawi bawk a. Tun hnaia tlawh hlawh em em ‘Ngai tlang’ lawnna step chu MGNREGS hnuaia “Project Rotling” 15 thlan chhuah te zingah telin, hemi Project atanga step chu siam a nih thu a tarlang a. Minister chuan MGNREGS thawktute hmalakna leh Social Audit Unit-in FY 2024-25 chhunga Mizoram chhunga khua 874-a hnathawhte an endik kim vek thei chu fakawm a tih thu a sawi bawk a ni.

Vawiin thutkhawmah hian MGNREGS hnuaia hnathawhte thlirletna hun hman a ni a, FY 2025-26 atan hna 5,758 thawh tan tawh niin, chung zinga hna 3,326 chu thawh zawh tawh a ni a. Job Card 2,13,197 pek chhuah tawh zingah Job Card nung 2,12,676 awmin, heng zingah hian hna thawk thei (Active Worker) 2,13,444 an awm a ni. Tunah hian Mission Amrit Sarovar Phase II kalpui mek niin, hmun 131 ah dil thar siam leh a awm sa siam that (renovation) nan hmalak mek a ni a. Social Audit Report atangin MGNREGS hna thawh kawnga harsatna hrang hrang tawhte leh chinfel an nih thu tarlan a ni.

He hunah hian SEGC chuan FY 2025-26 atangin State Legislature-ah Annual Report pe thin se ti a rel a ni a, MGNREGS State Cell chu hma la tura ruat a ni a. MGNREGS hnuaia hnathawhte zirchianna nei turin State Institute of Rural Development (SIRD) ruat a ni bawk. MGNREGA staff-te hlawh pun leh Employee Provident Fund-a hamthatna an dawn ve theihna tur chungchang ngaihtuah turin Committee din ni se ti a rel a ni a. Vawiin thutkhawmah hian Pu R. Zarzosanga, Commissioner & Secretary RD&AD & Member Secretary, SEGC, Pi Teresy Vanlalhruaii, Secretary, PHE, District hrang hrang Project Director-te bakah Department hrang hrang leh Village Council aiawhte an tel a. Pu V. Lalengmawia, Addl. Secretary, RD&AD chuan lawmthu sawiin hun a khar a ni.