4085/2025-2026

Dated Aizawl, the 21st January, 2026 : Vawiin khan Prof. Lalnilawma, Minister, Rural Development & Administration Department (RD&AD) chuan a office chamber atangin Video Conference-in MGNREGA hnuaia Project Rotling hnathawh hrang hrangte leh hmasawn dante thlirhona chu RD&AD official-te a neihpui a ni.

Minister chuan Project Director-te leh BDO-te chu an hna a hun taka zo thei turin theihtawp chhuah turin a chah a. ⁠RD&AD kaltlanga hnathawh reng reng a tha tur a ni a, thingtlang mipuite tan malsawmna ni thei turin kan hna kan thawk tur a ni, a ti a. Project Rotling hi a hming ang ngeiin, thingtlang khuate tan rotling a nih theih nan theihtawp chhuah zel turin officer-te a fuih a ni.

Project Rotling hi khawtlang mamawh rotling siamna tura RD&AD-in Project Director, DRDO-te leh BDO-te tan inelna a siam hmanga thlan chhuah a ni a. Short Term Project atan Project 5, Medium Term Project atan 5 leh Long Term Project atan 5 theuh thlan chhuah an ni a. Vawiina thlirhona neih-ah hian Project enkawltu Project Director-te leh BDO ten powerpoint presentation hmangin an project rotlingte sawifiahna hun an hmang a, harsatna an neihte leh hmalak ngaite sawiho nghal a ni.

He hunah hian Pu R. Zarzosanga, Commissioner & Secretary, Pu V. Lalengmawia, Additional Secretary leh RD&AD Official dangte te an tel a ni.