272/2026-2027
Aizawl dated 24th April 2026 : Prof. Lalnilawma, Minister, Rural Development & Administration Department chuan ‘Sashakt Panchayat, Sarvangeen Vikas’ – Empowered Panchayats, Holistic Development’ tih thupui hmanga Directorate of Local Administration bultuma, DRDO Aizawl Conference Hall-a National Panchayati Raj Day lawmna hun chu khuallian niin a hmanpui a. Pu Lalchawimawia, Joint Director, Directorate of Local Administration chuan hun kaihruaiin , Dr. Lalngura Tlau, Director chuan National Panchayati Raj Day chunchang sawi hawnna hun a hmang a. Pu ST Lalhmingmawia, Joint Director chuan lawmthu sawina hun a hmang bawk a ni.

National Panchayati Raj Day 2026 lawmnaa khuallian RD & AD Minister Prof. Lalnilawma chuan, ram tih hmasawnna tura pawimawh ber chu khawtlang tih hmasawnna a nih thu tarlangin, chumi atana mawhphurhna pawimawh tak chu, khawtlang inrelbawlna kaihruai tura thlanchhuah – Village Council member-te kutah a awm thu a sawi a. Kum 2047-a India ram hi ram hmasawn leh ropui,’Vikshit Bharat’ a siam a nih theih nan Village Council hi hmanraw tangkai tak an nih mek thu a sawi bawk a ni.

RD&AD Minister chuan Village Council kaltlanga khawtlang tih hmasawnna hna thawh kawngah, inelna thianghlim neih thin a pawimawh thu a sawi a. Khawtlang mipui aiawh tura thlan tlin kan nih angin, a tul hunah chuan kan mimal ngaihdan leh awn lam neihte dah boin, khawtlang thatna tur dah pawimawh hmasak ber thin a tul thu a sawi a. A hun taka tanrual leh thawhhona boruak siam thiam khawtlang hruaitu awmna apiangah hmasawnna a kal chak thin thu a sawi.

Khawtlang tana rotling, tangkaipui ngei ngei tur chauh ruahmanna siam thin tur a nih thu Minister chuan sawiin, a hun taka hna thawh zawh a pawimawh rualin, a nih dan tur taka thawh a ni em, tih ngaih pawimawh tel tur a nih thu a sawi a. Khawtlanga mi harsate dawm kanna tur scheme kalpuina kawngah pawh a dawng tur dik tak ten an dawn ngei theih nan Village Council chu a pawimawh hle thu a sawi.

Prof. Lalnilawma chuan Village Council Act thar tlangzarh a nih thu tarlangin, he dan bu chhungah hian Village Council-ten thu an neihna chi hrang 21 lai tarlan a nih thu leh an mawhphurhna pawimawh tak tak pawh ziah lan a nih thu a sawi a. Village Council member-te lawmman ennawn a nih theih nan hmalakna a kal mek thu sawiin, 15th Finance Commission hnuaia 2021-22 Grant la bangte, 2022-23, 2023-24 leh 2024-25 Grant-te hmuh tawh a nih thu a tarlang a. 16th Finance Commission-ah chuan Own source of Revenue (ORS), Village Council, mahni inenkawl thei tura ruahmanna siam thiamte chu ngaih pawimawh an nih tur thu a sawi.

RD&AD Minister chuan inrelbawlna felfai, langtlang leh hmasawnna thlen zung zungna khawtlang siam tur chuan, engkima Sawrkar rinchhan tlat tum Village Council nih loh a pawimawh thu a sawi a. Mahni kea din tum, mahnia intodelh tum tlat Village Council chuan khawtlangah hmasawnna a thlen chak zawk thu sawiin, Village Council tha tichak turin Sawrkar chu a inpeih reng thu a sawi bawk a ni.

Dr. Lalngura Tlau, Director chuan kalkhawmte lawmna thu sawiin; rampum huapa inelna hrang hrang zing ah Kawrthar N chuan theme 5-na ” Clean and Green Award” lawmman an dawn avangin lawmawm a tih thu a sawi a. Hmalakna hlawhtling hi Village level-ah nasa takin a innghah thu a sawi bawk. Mizoram pum ah Village council 830 a awm a, chung zing a 286 chu autonomous district area huamchhung a mi an nia, Village council te thawmthat nan village council tin ah Computer set sem chhuah mek a nih thu Dr. Lalngura Tlau hian a sawi.

National Panchayati Raj Day pual hian Village council 12 te hnen ah Computer set a hlan nghal bawk a ni.

He hun ah hian Rural Development & Administration a thawktute, I&PR ,SRRD, DRDO, Aizawl, Mizoram Village Council Association hruaitute leh Village Council thlanchhuah 12 te an tel bawk a ni.