2651/2025-2026

Dated Aizawl, the 13th December, 2025 : Ni 11, December 2025 khan Prof. Lalnilawma, Minister, Rural Development & Administration Department (RD&AD) chuan State Institute of Rural Development & Panchayati Raj (SIRD&PR) Silver Jubilee lawmna inkhawm chu Aijal Club-ah khuallian niin a hmanpui a, Silver Jubilee souvenir a tlangzarh nghal a ni.

Minister Prof. Lalnilawma chuan SIRD&PR din a nih theih nana sulsutute thawhrimna chu fakawm a tih thu a sawi a. SIRD&PR chu Mizoram tan a tangkai thu leh tangkai lehzual tura ngaihtuahna senga, hmalaknate zauh zel a ngaih thu a sawi a. He hunah hian Minister chuan Self Help Group-ten thil chi hrang hrang zawrh tham tak tak an tharchhuah tawh thu tarlangin SHG-te thil tharchhuah leh siamte chu ‘Selhel’ brand hmanga market tur a nih thu sawi bawk a. Thingtlangte tana hmasawnna thlentu ni zel turin SIRD chu duhsakna a hlan a ni.

Vawiin Silver Jubilee lawmna hun hi Pu R. Lalremsanga, Director, SIRD&PR chuan kaihruaiin, kalkhawmte lawmna thu a sawi a. Dr. Malsawmdawngliani Fanai, Assoc. Professor, SIRD&PR hnen atangin report ngaihthlak a ni a, Dr. Khawlsiamthanga Khawlhring, Assoc. Professor chuan lawmthu sawiin hun a khar a ni.

SIRD&PR hi October 16, 2000 khan Mizoram sawrkar chuan a din a. Rural Development & Administration Department hnuaiah Autonomous Body niin, State leh Central sawrkar-in a enkawlna senso hi an intum sem a ni. SIRD&PR hi a tirah Directorate of Rural Development, Aizawl hnuaiah a awm a, 2002 khan Kolasib-ah an chhuk a, chumi hnuah October 2016 khan Durtlang Campus-ah an insawn chho leh ta a. He campus hi 2010 khan Ministry of Rural Development, Government of India chuan a sakna atan cheng Nuai 1707.89 a seng a ni.

SIRD&PR, Durtlang Leitan-ah hian Conference Hall - 2, Class Room - 1 leh Video/Training Conference Hall – 1, Auditorium – 2 a awm a. Hostel leh Guest House a awm bawk a. Hostel leh Conference Hall te hi Department dang tan pawh Nominal cost in a ruah lai chuan hman theih reng a ni a. Chhawr tangkai turin kan inbeisei a ni. SIRD&PR, Durtlang Leitan-ah hian Director bakah thiamna hrang hrang nei Core Faculty 7, Faculty 4 leh Staff 15 bawr an awm.

SIRD&PR hanthawh ber chu Training buatsaih hi a ni a, High officials atanga Self Help Group thlengin training an pe thin a, kumtin Training Programme 100 bawr bakah Research, Social Impact study, Social Audit leh study dang an nei thin a.  SIRD&PR hnuaiah hian Lunglei, Thingsulthliah leh Kolasib-ah Extension Training Centre (ETC) a awm a. ETC te hi Ministry of Rural Development, Govt. of India in Infrastructure Development a din a, Training fund atan Rs. 20/- lakhs kum tin a pe ve thin a.  Principal leh Staff salary te hi erawh chu State sorkar tum a ni.

SIRD & PR hnuaiah Siaha, Champhai, Serchhip, Mamit leh Kolasib-ahte hian District Panchayat Resource Centre (DPRC) a awm a. Hengte hi Head Faculty leh staff dang ten a hmunah an thutchilh vek bawk a. ETC/DPRC zawng zawng hi Hostel, Conference Hall, Auditorium leh Staff quarters tha taka thuam vek an ni a. Heng te hi a ruah lai chuan nominal cost a hman theih vek a ni.