Tripura Transit Camp a Mizoram mi Reang (Bru) awmte laklet hna chu 2nd November, 2016 atanga tan leh turin Mizoram sorkar chuan ruahmanna a siam a, hemi chungchangah hian vawiin khan ‘District Level Co-ordination Committee on Bru’, Kolasib chu an chairman District Bawrhsap Pu H.Lalengmawia, IAS hovin a pisaah an thukhawm.

Vawiin meeting-ah hian Kolasib District a Reang (Bru) chhungkua let tura beiseizat 628 an nih thu tarlan a ni a, heng zingah mahni thua lo let an awm nual avangin chhungkaw zat hi Identification hna kalpui a nih hnuah a tlem rin a ni. Bru Repatriation buaipui tur hian Nodal Officer leh Assistant Nodal Officer te ruat an nih bakah, Adminitrative Officer pariat Reang (Bru) kirte awmna tur khua Bairabi, N.Thinglian, Dilzau, Zodin (Rastali), Meidum, Pangbalkawn, Bukvannei leh S.Chhimluanga school zirtirtute ruat an ni a. Community Kitchen leh Temporary Shelter siamna tur atana sum mamawh Rs.110,02,560/- leh veivahna tur lirthei hmanna mamawh zat tur DTO, Kolasib in a siamte chu Home Department pawm tur a thawn a nih thute meeting-ah hian sawihova tarlan a ni. Heng bakah hian Identification leh a laklet hnathawk tura thawktu mamawh dan tur te sawiho niin, SSA, DRDA leh DLAO Office in thawktu pahnih theuh an thawh thu te tarlan a ni a, Liason Officer tur pek belh tura dilna Home Department lamah thehluh a nih thu tarlan a ni bawk. Bairabi lei zawh theih a siam zawh hman a nih tak loh avanga ruahmanna hmasa awm chu siam that vek a nih thu leh harsatna awm thei te leh ruahmanna thar te meeting-ah hian sawiho a ni.