Vawiin  chawhma dar 11:00 khan D.C Conference Hall Mamit-ah, Mizoram State Archives, Arts and Culture Department bultumin Record vawn that pawimawhna te inhrilhriatna hun buatsaih a ni.
He hun Pu V.L Remliana SDO(Sadar) Mamit kaihhruaiah hian Resourse Person, Pu F. Lalthanmawia Superintendent of Archives, Art and Culture Department chuan zirtirna pe-in Record hi amah ngawtin a tangkai lo va, mumal taka enkawlna a awm chauhvin a hlu a ni a ti a. Thil hlui vawn that pawimawhna hi tunlai khawvel ngaih pawimawh leh buaipui ber pawl a ni a ti a, kan hriatna innghahna chu Science & Technology a hmasawnna ten a sawi nghing mek a, hetiang hunah tak hian kan tobul, hnamzia leh finna haichhuaka zawng hmu turin Archives hi a pawimawh a ni a ti, Tawngka maia sawi hian awmzia a neih loh thu leh ziaka kan dah ngei loh chuan beh chhan tlak a ni lo a ni a ti. Pu Thanmawia chuan Mizote thil record leh chhinchhiahna kawngah kan taima tawk lo nia a hriat thu tarlangin theihtawp chhuaha tan kan lak a tul a, tuna hma kan lak tan chuan thangtharte tan mai bakah kan hnam tan rotling kan siam thei dawn ani tiin kan file chan theuhte uluk taka vawng tur leh kan hman zawh hnu pawh tha taka vawng zui turin Department hrang hrangte leh NGO hruaitute a chah a ni. Pu Thanmawia chuan Record hlui, mimal emaw,  Sorkar Department hrang hrangte an records leh file hluite Archives ah an dah duh chuan englai pawhin an dawn theih reng thu a sawi bawk a ni.

He Programme ah hian Mamit khawpui chhunga Department hrang hrang hotute, Office a Record buaipuitu te bakah tlawmngai pawl, YMA, MUP leh MHIP hruaitu mi sawmruk(60) chuang an tel a ni.