Kolasib-a Inter Village Red Ribbon Football Tournament kar hnih chuang khelh chu vawiin khan Pu Lal Thanzara, Parliamentary Secretary to Chief Minister chuan a khar ta.

Kolasib Diakkawn field-a kharna inkhawm neihah Pu Lal Thanzara chuan, tunah chuan Mizote chanchin hi Football tel lovin a sawi hleih theih tawh lova, ram pawnah India ram hmun hrang hrangah kan thalaite football khelin ei an zawng ta mek a, Kolasib District atang pawhin tlangval 8 in ram dangah an khel mek a. Heng hi a chhan chu kan sawrkar hian thalaite hmakhua nasa takin a ngaihtuah a. Thalaite tih hmasawn nana thil tul infrastructure lamah nasa takin tan a la a, khelmual laih a ngai pawimawhin Artificial grass pawh zoram hmun thum laiah a phah tawh a. Tunah hian Champhai leh Lawngtlai-ah te a ti leh dawn mek a. Aizawl lammual chu khawvel standard ek pha turin Lighting system peih fel thawkhat a ni tawh bawk a ni, a ti. All India Football Federation leh FIFA te pawhin kan thalaite talent hi an hria a, training te pawh min rawn neih sak nual tawh a ni, Pu Lal Thanzara chuan a ti a ni.

Pu Lal Thanzara chuan Kolasib chu field chei tur hmun rem nei khua an ni tiin Saidan Sports Academy leh Venglai field te chu sawrkarin a chei zel dawn a ni, a ti a. Infiammite chu midangte aia insum thei tur an ni tih inhre thar turin a chah a. Thinchhia leh insum theilote chu national level a lang pha an awm ngailo a ni, a ti a ni.

Pu R. Lalramnghaka, DC Kolasib chuan Tournament kharna inkhawm hi a kaihruai a. Tun tum Red Ribbon Football Tournament-ah hian Kolasib District chhung atangin VC team 21 in an khel a. Team 11 chu Kolasib khaw chhung niin team 10 chu khaw pawn an ni. Red Ribbon pual a nih angin Aids awareness nasa taka neih a ni a. Banner/ Slogan insiam siak te, thla la tha te tana lawmman siam a nih bakah HIV lam hawi chanchinbu thu ziak tam hnenah lawmman pek a ni. Tun tournament chhung hian mi116 –in tournament neihna hmunah hian thisen an test bawk a ni.