Rural Development Minister Pu R. Lalzirliana chuan vawiin tlai khan Regional Sales of Articles of Rural Artisans Society (SARAS) Fair vawi hnihna chu a buatsaihna hmun Directorate of Transport New Building, Temple Square-ah a khar.

He fair hi RD Department hnuaia MzSRLM (Mizoram State Rural Livelihood Mission) in a buatsaih niin, a kharna hunah hian fair neih chhunga titha thlanchhuahte hnenah Minister hian lawmmawn a hlan bawk a ni.

Minister Pu R. Lalzirliana chuan mahni kutkawih leh tharchhuah ngei hralhchhuahna hun leh hmun remchang an neih chu lawmawm a tih thu a sawi a. kuthnathawktuten an inhrlh ve theih nana RD Department thawk zawng zawngten an ngaihtuahna leh sum leh pai senga hma an lakna chu fakawm a tih thu sawiin, kuthnathawktute tan RD Department chu an mamawh ni khuaa an tlan luhna ber a nih fo avangin inpuitlang a thawkho vek tur annih thu a sawi bawk.

Saras fair kharna hun hi Pu Lalhmingthanga, IAS, RD Department Secretary in kaihruaiin, Self Help Group aiawh atanga thusawi ngaihthlak a ni bawk a. Pi K, Lalrinzuali, State Mission Director, MzSRLM leh RD Department Additional Secretary ni bawk chuan lawmthu sawiin hun a khar a ni.

Regional SARAS Fair 2016 hi November ni 29, 2016 khan hawn a ni a. Mizoram chhunga Self Help Group hrang hrang leh state pawn atang te in a vaiin stall 127 hawn a ni a. Uttar Pradesh atangin stall 3 leh Tamil Nadu atangin stall 1 a awm a ni.

Vawiin thleng hian dawrtu mi 16,700 chuang an awm tawh a, Rs. 25 lakhs inhralh tawh anga chhut a ni.

Fair neih chhung hian stall hrang hrangte endik niin, category pathumah lawmman sem a ni a.

Chungte chu:

Best Stall (Citation leh Rs. 5000) - Alfonsa Self Help Group, Thingdawl RD Block

Best Block (Citation leh Rs. 7000) - East Lungdar RD Block

Best District (Citation leh Rs.10,000) - Kolasib District