Nimin khan Kolasib District huamchhunga Naupiang & Thi chhinchhiahtu Registrars of Births & Deaths mi 50 velin Training RMSA Meeting Hall-ah an nei.

Training hi Pu LalrikhumaSailo, Joint Director, Economics & Statistics, Aizawl atanga lo kal leh Pu H.Lalduhsanga. 1st Class Judicial Magistrate, Kolasib-ten he Annual RBD Training hi an hmanpui ani. Training neihpuitu Pu Lalrikhuma Sailo, Joint Director, Economics & Statistics Department chuan‘Registration of Births & Deaths Act 1969-in a phut angin India rama naupiang (thisa a piang telin) leh mitthi zawng zawng a bo a bang awm lovin chhinchhiah vek tur a ni’ a ti. Nausen lo pianghlimin Sawrkara chanvo a neih hmasak ber chu a hming leh pianni chhinchhiah hi a ni a, chumia a mawhphurtute chu vawiin a Registrar lo kalkhawmte hi in ni a, in mawhphurhna a sang hle a ni a ti.

A sawizelnaah Pu Lalrikhuma Sailo, Joint Director chuan Pian/Thih atang a ni 21 chhungin awlsam takin engmah chawi ngai lovin Damdawi Ina piang chu Damdawi Ina Registrar hnenah, In lama piangchuLocal Registrar hnenah in register theih a ni. Ni 21 a ralhnu, ni 30 a ralhma-in Aizawl District Research Officer (Economics & Statistics) hnenah late fee Rs10/-leh Certificate man Rs 100/- (a vaiinRs 110/-) chawia in register theih a ni a, ni 30 a ralhnu, kumkhat a ral hmachuan Director, Economics & Statistics hnenah late fee Rs100/- leh Certificate man Rs 100/- (a vaiinRs 200/-) chawia in register theih a ni. Kum khat a ralhnu chuan Kolasib 1st Class Judicial Magistrate phalna lak hmasak a ngai a ni.

Chuvangin ni 21 chhunga awlsam taka tih theih anih laia in register ngei turin Kolasib District mipuite chu a chah. Kum khat a ralhnu-a piang leh thi registration tih nana tlemberah hetiang hian pawisa sen angai:-

Late fee - Rs 1,000.00

Non-Availability Certificate(NAC) - Rs 100.00

Certificate man - Rs 100.00

Register tawhlehtawh lo zawn man - Rs 100.00 (Bu khat/kumkhat register)

Total - Rs 1,300.00

Registration of Births & Deaths Act, 1969 hi Mizoramah chuan kum 1985 atanga hman tan chauh anih avangin hemi hmalam a piang/thite chu Delayed Registration tih a ngai. Delayed Registration-ah chuan sawi tawh angin 1st Class Judicial Magistrate phalna a ngai. A tihdan kalhmang chu District Research Officer Office, Kolasib-ah zawhfiah theih a ni.

Sawrkar-in hetianga Naupiang & Thi Registration leh Certificate chi hranghrang lak man a tihpunna chhan hi a hun taka (ni 21 chhung) Naupiang leh Thi Registration titur a mipui ten kan ngaihpawimawh theihna tur leh Birth Certificate hi India khua leh tui nih chhinchhiahna ni lo mahse, document pawimawh taka hman a nihsi avanga Birth Certificate pek loh turte hnena pek a awm lohna tura hmalakna chi khat a ni. Birth Certificate hi khua leh tui nihna (Citizenship) chhinchhiahna ni lo mahse, Voter’s ID etc. dilna atan thuneituten thil tula an chhiar si avangin Registrar kalkhawmte chu fimkhur hle turin a chah.A bik takin Border Area-a awmte hnena Birth Certificate pekchhuah hi fimkhur a ngaizual hle a ni’ a ti.

He hun hmanpuitu Pu H.Lalduhsanga, 1st Class Judicial Magistrate i/c RBD, Kolasib pawhin Births & Deaths Registration leh Certificate pek chhuah chung changah fimkhur a ngaih thu leh Dan ang taka thiltih hi a him ber thu a sawi a. Birth/Death Certificate nei turin Economics & Statistics Deptt. emaw, Judicial Magistrate-te phalna la pawhin awlsam takin ka nei thei tho ti a tawn zauh zauh thu leh Economics & Statistics-a Non-Availability Certificate (NAC) la lova phalna pe mai tura dil ngawng ngawngtu a tawn zeuh zeuh thu a sawi a.

Pu Lalduhsanga 1st Class Judicial Magistrate chuan chutiang mite chu Dan ang thlapa thilti thin tura a hrilh thu a sawi. Chuvangin Naupiang leh thi chhinchhiahtu Registrars of Births & Deaths kalkhawmte chuan hna rinawm taka thawk tur leh Dan ang taka fimkhur taka thawk turin a chah.