Vawiin chhun dar 12:00 khan NLUP 2nd Phase, 2nd Installment chu Reiek khaw Community Hall-ah chhungkaw 239 hnenah sem a ni. Semna inkhawm hi Pu R.S. Lalzamliana, Addl. DC-cum-NLUP Nodal Officer, Mamit District in a kaihruai.

He NLUP semna hun a khuallian Pu Lalrobiaka, Dampa Bialtu MLA chuan kalkhawmte hma ah thu sawiin, “NLUP chu Campaign nan a sem a nilova, kum 20 rambuai a awm hnu ah mirethei tam tak an awm phah a, chungte khaichhuahna tur, Lo hal avanga ram tih chereu bansan na tur leh tuihna te humhalh na turin Sorkarin a buatsaih a ni” a ti.

Dik tak leh taima taka NLUP sum hmangtute chuan 1st Phase an dawn atang mai pawhin chhungkaw eizawnna tling an din der tawh a ni tiin, 2nd Phase NLUP sum dawngtute chu an mahni tan a nih angin rinawmna leh taimakna nen NLUP sum chu hmang tura chahin, rinawm leh taima taka thawktu chu Pathianin malsawmna a pe thin a ni tih Pu Robiaka chuan a sawi bawk.

2nd Phase NLUP vawiin a  sem hi Forest Deptt. - 5; Agriculture Deptt. - 161; Sericulture Deptt. - 3; Industry Deptt. - 18; AH & Vety Deptt. - 4; Soil & Water Conservation Deptt. - 15 leh Horticulture Deptt. atangin chhungkaw 33 hnenah pek an ni.