855/2023-2024

Kolasib dated 20th June 2023: Vawiin khan Govt. High School, Kolasibah Deputy Commissioner’s Office leh District Project Office, Samagra Shiksha, Kolasib tangkawp buatsaihin, ‘Political History of Mizoram’ tih thupui hmangin Essay ziah leh Painting Competition neih a ni a. Pu John LT Sanga, Deputy Commissioner-in kalkhawmte lawmna thu sawiin Pi K.Lalsiamliani, District Education Officer chuan hun a kaihruai bawk a ni.

Pu John LT Sanga, Deputy Commissioner chuan khawvel hmun hrang hrang ah inrem lohna avangin thihna leh buaina nasa tak a thlen thin thu leh ram leh ram, chi leh chi inkarah inrem lohna a awm avangin harsatna tawk an awm mek thu a sawi a. Mizoramah chuan ram leh hnam hmangaihtute inpekna leh ruahmanna avangin remna a awm thu leh chu remna chuan zalenna leh ralmuanna a thlen thu a sawi a. Remna chu hlut thiam a pawimawh thu leh remna a awm zel theih nana mi tangkai nih tum turin Deputy Commissioner chuan zirlai naupangte a chah a ni. Remna chuan hmasawnna a thlen thin thu leh remna famkim awm tur chuan mahni inrem hmasak te, mahni inchhungkhur a inremna siam te leh khawtlang inrem tur a hmalakna a pawimawh thu sawiin chung chuan ram pum inremna a thlen thin thu a tarlang bawk a ni.

Remna Ni 2023 lawmna pual a Essay inziahsiakna ah hian Kolasib khaw chhung a Higher Secondary School zirlai 15 an tel a, Painting Competition-ah hian High School leh Middle School zirlai naupang 30 an tel a ni. Essay inziahsiak ah hian pakhatna in Certificate leh Cheng 30000 a dawng ang a, pahnihna in Cheng 20000, pathumna in Cheng 10000 a dawng bawk ang. Painting Competition-a lawmman pakhatna hian Cheng 3000, pahnihna in Cheng 2000, pathumna in Cheng 1000 an dawng ang a. Quiz leh Essay-a lawmman dawngte hi State Level inelna ah an tel chho leh dawn bawk a ni.