Vawiin hian Lawngtlai DC Conference Hall ah kan hma lawka Republic Day 2016 lo thleng tur lawm dan tur ngaihtuahin Bawrhsap Pu J. Hmingthanmawia hovin an thukhawm.

He ni lo thleng tur hi Lawngtlaiah hian ropui taka hman nise an ti a, a hmanna pui ber hi Lawngtlai Vengpui Playground ah neih tura ruahman a ni. Zing ni chhuah rualin sawrkar building ahte hnam puanzar zar ani ang a, dar 10:30 a.m ah a lawmna hun pui ber hi hman tan tur a ni. Parade Contingent 13 neih tura ruahman niin Republic Day puala District huap Volleyball Tournament buatsaih a nih dawn bakah he ni denchhen hian Homes/Centres, Hospitals leh Jail ah te thilpek hlan a ni bawk ang. Chawhnu lamah at Home Tea Party, Bawrhsap chenna tualah neih tura ruahman a ni bawk.

Hlawhtling taka he ni hman a nih theih nan hian sawrkar Department hrang hrangte chu tih tur chanpual ruahman sak an ni hlawm a, thil lian tham bikte chingfel turin Sub- Committee te pawh siam nghal an ni bawk.

Pu J. Hmingthanmawia chuan, India ram tana ni pawimawh berte zinga mi Republic Day hlim leh him taka kan hman tlan theihnan tih tur pawimawh hrang hrang a awm a, chung hna pawimawhte chu a tul ang zela thawk turin Department leh pawl hrang hrangte kan beisei thin. He ni tluang taka kan hman theih nan mahni zawna tih tur awm theuhte hlen chhuaka, theihtawp chhuah theuh turin kalkhawmte a ngen a ni.

He meeting ah hian Department hrang hrang aiawhte, LADC aiawhte, tlawmngaipawl hrang hrang aiawhte, Sport Association aiawhte bakah chanchinbumite an tel a ni.