Vawiin Jan.8, 2010 hian Aizawl Bawrhsap hovin kumin 2010 Republic Day lawm dan tur mi pawimawhten an relho. Kumin Republic Day (vawi 61-na) lawmna atan Hockey-Mipa leh Hmeichhia, Volley Ball – mipa leh Hmeichhe tan buatsaih a ni dawn a, Inter-Village\Veng inelna siam a ni dawn. January 18, 2010 atangin AR Ground-ah khelh tan tur a ni ang.
Republic Day Lawmna pui ber Parade Contingents 24 aia tlem lo, Band Party 4 vel te nen A.R. Ground-ah neih tum a ni a; Governor At Home pawh mi pawimawh sawm bikte tan a awm bawk ang.
He Committee-ah hian Aizawla Department hrang hrang an kim thawkhat a, Sipai leh Police lam hotute pawh an kal tha hle. Aizawl Bawrhsap Pu C.Thanchhuma chuan kalkhawmte chu Republic Day Lawmnaah hian kal theuh tur leh Sorkar Officer zawng zawngte chu heng India ni pawimawh zual pahnih- Republic Day leh Independence Day Lawmnaah hian kal ngei tura taimak chhuah theuh turin a ngen. ‘Sorkarin Invitation a pekte ngat hi chu kal ngei tura beisei an ni a, thupek ang hiala ngaih pawh a tul a ni,’ tiin Bawrhsap chuan mahni Department theuhva Officer te inhrilhhriat a pawimawh thu leh hemi ni ropui lawmna atana mawhphurhna nei zawng zawngten theih tawp chhuah theuh turin a ngen nghal bawk a ni.
