Vawiin khan RBI Foreign Exchange Department, Guwahati huaihawtna in Import-Export leh Border Trade Seminar chu I&PR Auditorium, CHANEM Building Champhai ah neih a ni a, Champhai Bawrhsap Pu Vanlalngaihsaka, IAS, in a hmanpui.

Seminar ah hian Bungraw lakluh leh thawnchhuah leh India- Myanmar ramri hrula insumdawn tawnna kaihnawiha hriattur hrang hrang in hrilhhriatna leh inzirtirna neih a ni a. Border Trade atana lehkha pawimawh (Documents) ngai leh Dan ina bungraw hrang hrang lakluh leh thawnchhuah a phal leh phalloh chin te pawh in hrilhhriat a ni a. National e-Governance plan hnuaia Sawrkar leh Sumdawngmi tana indawrh awlsam zawkna tura duan Online Registration chungchang pawh inzirtir a ni a. Reserve Bank of India hnuaia siam eBiz portal (www.rbi.org) ah inziahluh theih niin, hei hian inziaklut tur te tana Sawrkar Office hrang hrang tlawh kual ngai thin chu titawpin chak zawk leh rang zawkin hma a lak theih phah dawn a ni. RBI leh Bank in dawrtu mipuite chu an ATM Card Number leh Pin Code an dil ngailoh thu sawilan a ni a, Mipuite chu heng bumtu phone call, message leh E-mail laka fimkhur tura chah an ni a. Hemi bakah hian thil hriat duh chungchangah zawhna leh chhanna hun neih a ni bawk.

Champhai Bawrhsap pawhin thu sawiin Zokhawthar a Land Customs Station chungchang, bungraw chhekkhawmna in leh Ramri Hrula insumdawn tawnna kalphung te chu a tarlang a. India-Myanmar Border Trade chu chak leh zuala hmasawnna turin Tiau lui chunga lei chu a hlui tawh avangin dawhthat a pawimawh thu leh Rih leh Tiddim inkara Sawrkar Laipui sum senga kawng siam mek chu chak zawka hmalak a ngaih thu a tarlang a ni.

Workshop ah hian RBI, Guwahati atangin mithiam Pu MT Muanding Guite, DGM Foreign Exchange Department leh Pu Manish Kumar AGM ten zirtirna pe in Champhai District a Bank hotute leh Bank dawr thin mipuite an tel a ni.