Council of Ministers, Mizoram Sawrkar in ni 21 August, 2012 a an lo rel leh an pawm tawh ang in Results Framework Document (RFD) chu sawrkar kum 2013-14 chhung hian Department thlanchhuah te hnathawh tihpuitlinna (performance) en na atan hman tum a ni a. Hemi a hmalak tanna atan hian RFD chungchangah nihnih awh tur Workshop Department hrang hranga Commissioner te; Secretary te leh Departmental Heads te tana buatsaih chu vawiin khan Administrative Traning Institute (ATI) ah tan a ni a, Workshop hawnna inkhawm hi DP & AR Minister Pu H. Liansailova’n hmanpui a ni.
Pu H. Liansailova chuan Results Framework Document chu Sawrkar hnathawh leh hmalakna tehna tha tak leh mipui rawngbawlna kawnga inrelbawlna tha zawk thlen thei tu nia a hriat thu sawiin, chu chuan inrelbawlna changtlung zawk leh sawrkarna tha (good governance) a thlen thei a ni a ti a. Sawrkar chuan mipuite beiseina a ngaipawimawh a, chuvangin Council of Ministers pawhin RFD chu a taka kalpui rel leh an pawm thu sawi langin officer kalkhawm te chuan Workshop hi an hlawkpui ngei a beisei a ni a ti bawk.
Chief Secretary Pi L. Tochhong, IAS chuan Sawkar hmalakna leh ruahmanna tihhlawhtlin kawngah sawrkar hnathawkte an pawimawh a, an hnathawh tehfung pawimawh ber Performance Appraisal Report (PAR) chu a tha thawhkhata mahse tun aia huam zau leh tha zawka siam a la tul dawn a ni, a ti. Pu Lalram Thanga, Principal Secretary to Chief Minister in kalkhawm te lawmna thu sawiin Pu Chetan B. Sanghi, Commissioner & Secretary, DP&AR in lawmthu sawina a nei bawk a ni.
He Workshop a training leh a tul dang rawn ti tur in Sawrkar laipui atangin Dr. Prajapati Trivedi, Secretary, Performance Management Division, Cabinet Secretariat leh a team te member 11 an lokal a. Assam Sawrkar atangin Joint Secretary leh officer dang pakhat RFD chungchang an tawn hriat sawi turin an lo kal bawk.
RFD hi sawrkar laipui chuan kum 2009 – 2010 atang khan a kalpui tan tawh a, tunah hian a hnuaia Ministry 79 ah te kalpui mek a ni a. State 12 in RFD hi an kalpui tan tawh a, Hmarchhakah chuan Assam leh Tripura in an lo tan tawh bawk a ni.
