Vawiin khan Mizoram Deputy Chief Minister Pu Tawnluia chuan Food Security Act, 2013 in a ken tel pawimawh tak retailer dawr tina buhfai leh thil dang hralh chhuahna tur khawl (electronic point of sale device) semna hun leh Mizoram chhunga hetiang khawl hman tan a nih theih nan retailer te tana training buatsaih a hawng.

Retailer ten khawl hmanga buhfai leh mipui mamawh dang semchhuah tanna tur programme hawngtu Deputy Chief Minister chuan he thil thar, Mizoramin kan hmang tan tur hi hmasawnna ropui tak a ni, a ti. A loa kan awm theih loh kan chawpui ber lakkhawm hi sawrkar chuan Supply Department kutah dahin a semchhuah hna chu Retailer ten an thawk a, he an hnathawh hi dawrkai dang te nen a inanglo tih leh mahni mimal hlawkna chauh atana thawk an ni lo tih hriaa rawngbawlnaa ngaia an hna te thawk turin Deputy Chief Minister Pu Tawnluia chuan retailer-te a chah a ni.

Fair Price Shop Automation tana khawl hman thin hi ePoS (electronic Point of Salte) khawl niin bukna khawl (electronic weighing machine) a keng tel a. He khawl hi Visiontek siam niin a model hi GL-11 a ni. He khawl hian finger print scanner, touch screen, QWERTY keypad, thermal printer, sim card slot pahnih leh wifi adapter te a nei a. A tul chuan mit note (iris) scanner pawh a vuah belh theih a ni. Operating System ah Linux a hmang a. A application hman mek hi Mizoram milin AePDS Team, NIC, Hyderabad ten an siam a ni. He khawl hian Ministry of Consumer Affairs, Food and Public Distribution, National Informatics Centre (NIC) leh Unique Identification Authority of India (UIDAI) te duh dan (guideline) a zawm vek a ni.

FPS date leh ration card data te hi digitized vek an ni tawh a. He data lakkhawm hmang hian chhungkaw tinte ration dawn zat tur bithliah a ni a. An dawn tur zat bithliah hi ePOS khawlpui (server) ah dah vek niin server atang hian data a mamawh ang te lain, ration hralhna te a update leh zel dawn a ni.

Ration la tur chuan an chhungkaw ration card number emaw, a aadhaar number emaw POS machine ah hian chhulutin finger print scanner ah a kut zungtang a nem ang a. A aadhaar number leh a finger print a inmil chuan an chhungkaw ration lak theih zat quota a lo lang ang a. POS khawl nena inzawm electronic weighing device ah a ration lak tur zat buk a ni ang a. A lak zat dik tak a chhinchhiah nghal zel dawn a ni. Engemaw avanga fingerprint authentication hi a dik theih loh chuan sms hmangin one time password a lo thleng anga, chumi hmang chuan ration a lak theih dawn bawk a ni.

He khawl hman tan a nih hunah chuan a dawng tur dik tak mipuiten an chanpual, buk dik takin an la thei ang a. Retailer te hralh bang a hriat theih vek tawh dawn avangin hralh ruk emaw tihcingpeng emaw a theih tawh dawn lo a ni.

He programme Pu HL Rochungnunga, Food Civil Supplies and Consumer Affairs Commissioner & Secretary kaihhruaiah hian MLA pathum Pu C.Lalmuanpuia, Pu Ramthanmawia leh Dr ZR Thiamsanga te pawh an tel a. FCS&CA hnuaia Aizawl West District huamchhunga retailer-te ko khawmin training an neihpui nghal a ni.