Vawiin chawhma khan ‘Consultative Committee of Revenue Department’ chu Land Revenue & Settlement Directorate Conference Hall-ah Land Revenue and Settlement Minister Pu J. H. Rothuama hovin an thukhawm. He meeting-ah hian Parliamentary Secretary Lt. Col (Rtd) Z S Zuala, Consultative Committee Member; Pu Joseph Lalhimpuia MLA; Principal Secretary LR&S Pu R. L. Rinawma IRS; Law Secretary Pu Singthanga te bakah Revenue Department-a senior officer te an tel a ni.
Pu J. H. Rothuama chuan hun rei tak Land Revenue chungchanga dan leh hrai buaipui anih hnua, Act changtlung tak tun Assembly session a pass a lo ni ta chu lawmawm tiin Act pass hnu hun reilo teah Department-in He Act hnuaia hman tur Rules an lo buatsaih chu fakawm a tih thu a sawi a. He Act buatsaihtu Expert Committee thawhrimna leh inpekna pawh fakawm a ti bawk. Expert Committee hi vawi 18 vel he dan buatsaih kawnga hian lo thukhawm tawh a ni.
Tun Assembly Session kalta a pass, The Mizoram (Land Revenue) Act, 2013 zulzuia Department-in The Mizoram (Land Revenue) Rules, 2012 a buatsaih chu Consultative Committee-ah pharh a ni a. He Draft Rules hi Consultative Committee chuan uluk leh zau takin an thlir ho a, siamthat ngai awm a an hriat leh belh tur a tha an tih te chu an sawiho leh a, he Dan hi Committee chuan hman turin a pawm a. Law Department chu he Dan hi Vet tur thawn nghal nise tih an rel. He Act-in a ken tel Dan hrang hrang te kenkawh dan tur a hrilhfiah bakah hman nghal turin form hrang hrang Draft Rules-ah hian ruahhman a ni a. He Act hi Mizoram Larsap chuan a pawmpuina (assent) a lo pe tawh nghe nghe a ni.
Consultative Committee chuan Civil Sub Division-ah te Revenue Technical Staff dah a tul hle a tiin hemi atana Surveyor Post siam belh rawtna chungchang an sawiho a. Tun dinhmun ah hian Surveyor a nghetin mi 81 leh contract-in mi 29 an thawk mek a ni. District Office-a motor lamah harsatna an nei avangin an hna a ti thuanawp fo thin a, hemi atana motor lei chungchang leh Aizawl District Settlement Officer pisa sak chungchang pawh Consultative Committee-ah hian sawiho a ni bawk. Revenue Department ruangam siam that (restructure) dan rawtna te pawh an ngaituah tel a ni.
