Vawiin khan I&PR Conference Hall-ah Mizoram State AIDS Control Society (MSACS) buatsaihin kum kalta chhunga College leh zirna in hrang hranga HIV/AIDS chungchanga hmalatu Red Ribbon Club-te hnathawh dan thlirletna leh hmalak zel dan tur sawihona hun hman a ni.

Review Meeting of Red Ribbon Club Nodal Officers-ah hian MSACS Project Director Dr. Eric Zomawia chuan thalaite zingah nunphung kaihhnawih natna HIV/AIDS chungchang hmalakna thuk lehzuala kalpui tul a tih thu sawiin he natna avanga inthinhrikna leh in enhranna lian tak la awm chu zirtirna tha hmanga tih reh thuai a tul thu a sawi a. Thisen endik tawh atanga HIV hrik pai hmuhchhuahna tam ber mipat hmeichhiatna a la nih avangin condom chungchang inzirtirna uar lehzuala kalpui a hun tawh a ni a ti a, SCERT nen tangdunin school 545 ah Adolescence Education Programme (AEP) kalpuia hmalak mek a ni tih a sawi bawk.

Kumin hian college leh zirna in hrang hrang 35 ah Red Ribbon Club din a ni a, vawiina Nodal Officer kalkhawmte hian nikum lama an hnathawh dante thlirletin kumina hma lak dan turte an sawi hona an nei a ni. Red Ribbon Club hi HIV/AIDS chungchang zirna in hung chhunga inzirtirna leh (campus intervention) leh nunphung hrisel taka nung tura inkaihhruaina pawl a ni.