Vawiin khan Mizoram Information Commission (MIC) leh Indian Institute of Public Administraion (IIPA) -Mizoram Regional Branch tangkawp chuan Right to Information Act-2005 chunghchang zirhona Zarkawt YMA Recreation Centre Hall, Zarkawt, PWD tlangah an buatsaih.

 He huna thusawitu Mizoram Chief Information Commissioner Pu Lal Dingliana IFS (Rtd.) chuan RTI Act-2005 awmzia leh India rama hman tan a nih dan a chinchhuakin kalkhawm te a hrilhfiah a. Mipui thlan sorkar dinna ram tam takah sorkar kalphung mipuiten an hriat a, an tawmpui ve theih nan he dan hi siam a ni tiin khawvel ram hrang hrang 90-ah hman mek a ni a. RTI chu khua leh tui ten an aiawh an thlan tlin te leh sorkar hnathawk ten eiruk leh thuneihna hman khawloh kawnga an venpui theihna hmanrua, thil hriatchian duh an neih apiang an hriat theihna dan a ni, a ti. Pu Lal Dingliana chuan RTI a tangkai tur anga mipuiten an chhawr thiam theih nan a nih phung leh hman dan an  hriat tul tiin RTI Awareness Campaign vawi engemawzat an neih tawh thu a sawi a. Information and Public Relations (I&PR) Department nen tangkawpin RTI Week chu 2011 atang khan Aizawl khawpuiah leh District khawpuiah te hman thin a ni a. Sorkar hnathawk te leh mipuite tana hriatzau nan Guidelines for State Public Information Officers and Information Seekers/Appplicants tih te, Guidelines for Public Authorities- State Public Information Officers and State Assistant Public Information Officers tih te, Guidelines for Information Seekers/Appplicants leh Guidelines for Public Authorities : DAAs; SPIOs;SAPIOs tih lehkhabute(booklet) an tihchhuah tawh thu Mizoram CIC hian a tarlang.

Kum 2006-2007 atanga kumin August ni 20 thleng khan sorkarah RTI application 4222 a lut tawh a, 1st appeal ah 47, 2nd appeal-ah 31 lut tawhin MIC ah complaint 79 a lut tawh a ni.

Inkhawm IIPA-Mizoram Regional Branch Chairman Prof.C.Lalkima’n a kaihruai a, IIPA-Mizoram Regional Branch Hony.Secretary Prof. Lalrintluanga’n lawmthu sawiin hun hnung a khar a ni.