Nihnih awh tur Workshop on NLUP, Mamit Distrit chu vawiin khan Chhim veng YMA Hall Mamit-ah tan a ni a. He Workshop hi Pu H.Liansailova Agriculture Minister in a hmanpui.
Workshop tan hma zing dar 10:30 hian Pu H.Liansailova Agriculture Minister   chuan NLUP Exibition ribbon chepchat in a hawng a  Exibition hi atlawh nghal a ni.

He mi zawh a chhimveng YMA Hall a inkhawm buatsaih hi Pu Zothankhuma IAS District Bawrhsap Mamit in  a kaihhruai ah thusawiin Pu Liansailova chuan Rinawmna leh taima taka thawka hlawhtlin pumpelh tumna hian hlawhchhamna-ah min hruai thin a ni a ti a, Mi rethei chhanchhuahna dan tura Sorkarin NLUP a buatsaih dan sawifiahin hlawhtlin pui tak tak tum lova sem leh dawnna rilru ringawt kan put chuan engang policy tha pawh ni ila kan hlawhtling ngai dawn lo a ni,  tiin kalkhawmte chu rilru dik, nghet leh rinawm taka thawka dinhmun nghet siamnan hmang turin a chah a ni. Khuallian chuan Ram Economy siam thatna tur chuan mi tam zawkte chawikan a ni tiin Mizoram a mipui tam berte innghahna, Agriculture atanga kan thawhchhuah hi 14% chauh a nih a vangin NLUP hmanga mi retheite khaichhuahna tur Programma hi kan hlawhtlin pui ngei tur a ni a ti bawk.

Pu P.L Thanga IAS (Rtd) Vice Chairman NLUP Implementing Board pawhin Power Point Presentation neiin NLUP thil tum leh awmzia, a kalphung chipchiar takin kalkhawm te zirtirna a pek bakah NLUP in din tanchhoh dan te, DPR siam a nih dan te, hemi atana Planning mumal tak state level atanga Village level thleng siam a nih dan te a sawilang bawk a ni.

Wg. Comdr. Lalnghinglova Chairman NLUP Marketing Cell pawhin thu a sawi bawk.

Workshop hi naktuk  hian chhunzawm leh tur niin hei hi technical Session anga hman a ni anga . He hunah hian Pu P.L Thanga IAS(Rtd), Vice Chairman NLUP Implementing Board-in thuhma sawina hun a hman zawh ah NLUP khawih tur Department hrang hrang, Soil & Water Conservation, Sericulture, Industries, Horticulture, AH& Vety leh Agriculture atangin mithiamten zirtirna hi an pe dawn a ni.

He Workshop ah hian Mamit Dsitrict a Department hrang hrang hotute, Officers te Village Level Implementing Committe (VLIC), khawtin atangin mi pathum theuh te bakah Mamit khawpui chhunga NGO hruaitute kohharn hruaitute leh thuthar thehdarhtute mi 390 chuang an tel a ni.