No.6065/2020-2021

Dated Khawzawl, the 14th October, 2020: Tukin khan Pu Zothanmawia, Deputy Commissioner Khawzawl District hovin Road Protection Squad chuan ke in Khawzawl khawchhung kawngpui an fang a, kawngpui nekchep zawnga hmalakna awmte an endik.

Kawngpui endik hi zing dar 6:30 ah DC chenna In Darngawn Veng atanga neih tan a ni a. Zaingen, Zuchhip, Dinthar leh Vengthar te endik a ni. Road Protection Squad convener Pu James Lalnithanga, SDO(Sadar) leh member dangten DC hi zuiin, an huamchhung chinah theuh Village Council leh YMA hruaitute'n kawngpui endik hi an lo tawiawm bawk a ni.

Road Protection Squad hian vantlang leh kawngpui tana hnawk leh kawngpui tihmelhem zawnga chet lakna awmte, kawngpui tichep zawnga hnawmhnawk siam hrang hrangte an endik a. Ngaimawhawm chin engemawzat chu a titute hnenah senghawi tur leh chhunzawm lo turin a hmunah an hrilh nghal zel a, Road Protection Squad hminga lehkha pek zel an ni bawk.

Khawzawl khawchhung kawngpui endik thawhkhatna hi July ni 25, 2020 khan Hermon, Electric leh Vengtharah neih a lo ni tawh a. Khawpui chhung kawng pawimawh zual chin chu hun rei lote chhungin endik vek tum a ni a, a tul leh remchan dan angin hmalak chhunzawm zel a ni ang.