Mizoram sorkar I & PR Deptt. buatsaihin Role of Media tih thupui sawihona chu vawiin chhun khan I & PR Auditorium-ah neih a ni a, tualchhung thuthar thehdarhtute leh parawn engemaw zat an tel tha hle.

 

 

Sawihona rawtchhuah dan leh a tobul tlangpui tarlangin I & PR Director Pu L.R. Sailo chuan tunlai khawvel-ah media te mawhphurhna a sang sawt hle a. Hmasawnna, zirna leh hriselna lamah te sorkar siam thlengin media te an pawimawh em avangin an mawhphurhna leh chanvote zau taka sawiho chu deptt. duhthusam a ni a ti. Inter Media Publicity Coordination Committee Chairman, DDK Station Director leh AIR NER II DDG nibawk Pu C. Lalrosanga pawhin thu sawiin hmarchhak state Radio Station zingah Mizorama kan neih ve Aizawl, Lunglei leh Saiha station-te chu hmanraw changkang zawka thuam tum mek an nih thu te, DDK Aizawl pawh thlalem hmanga khawvel pum huap a nih ve tawh thute sawichhuakin Central sorkar media deptt. hrang hrang leh state sorkar thawhhona thatzia chungah lawmthu a sawi a. Media-te tana inkhuahkhirhna dan leh hrai engemaw zat a awm laiin a pawimawh ber zawk erawh chu mahnia inthunun leh inkhuahkhirh self regulation chu media te tana zawm ngei chi a ni a ti.

MJA President Pu K. Sapdanga pawhin he hun chhimtute hnenah zawhna siamin thuthar thehdarhtute chu enge an nih an hmun dan sawi turin a sawm a. Mizorama media te chu thalai thazat hun pel tawh pavanglai tak anga tehkhinin an kalzel dan turah rawtna sawiselna leh fuihna an mamawh reng a ni a ti.

Vawiin sawihona ah hian thuthar thehdarhtute tana rawtna chi hrang hrang, fuihna leh hriattur tul hrang hrangte sawichhuah a ni a. Print leh Electronic media te tan Mizo tawng dik hman leh a lamdan ah pawh fimkhur se tih sawilan a ni bawk a. Thuthar thehdarhtute chu mipuite tan rawngbawltu, mipuite thian leh vengtu an nih thu te tarlan a ni.

Sawihonaah hian sawm bik te tangin midang bakah Pu Denghnuna, Pu Lalmanzuala, Pu F. Lalremsiama, Pu C. Thanseia, Prof. Lalkima leh Rev. Chuahthuama te pawhin thu an sawi  a ni.