No.5091/2020-2021   

Kolasib 15^th September 2020: Vawiin chawhnu khan Rotary Club of Aizawl chuan Covid-19 hrileng do nana hman tur hmai tuamna, Kut silna sahbawn leh pawisa fai cheng Singkhat, Kolasib District a hman tur an pe a, Pu Zothantluanga, Joint Secretary, Rotary Club of Aizawl chuan thilpekte hi Dr H Lalthlangliana, Deputy Commissioner hnenah a hlan a ni.

Pu Zothantluanga chuan Rotary Club dinchhan sawifiahin, theih ang anga tanpui ngaite tanpui hna an kalpui thin dan a sawi a, Mizoram chhunga Covid-19 do nan hian Sanitizer bur 2000, Hmai tuamna 2000 leh Kut silna sahbawn 2000 bawr vel semchhuah a nih tawh thu a sawi bawk a ni.

Dr H Lalthlangliana chuan Covid-19 hrileng do kawnga mimal inphalte leh pawl anga thilpek awm thin chu lawmawm a tih thu a sawi a, hri venga ramri a hnathawk leh hemi kaihhnawiha thawktuteah phurna thar a pek thin thu sawiin thilpekte chu tangkai tak a hman a nih tur thu a sawi bawk a ni.

Kolasib DC hnenah hian Rotary Club of Aizawl-te hian Mizorama thui hmai tuamna 390, Sahbawn 200 leh pawisa Rs. 10,000 an hlan a ni.