RTI Week 2014 puala Mizoram Information Commission in “The Right to Information Act, 2005 : Its uses and impacts in Mizoram“ tih thupui hmanga Essay Writing Competition a buatsaih chu vawiin khan Pu Lal Dingliana,Indian Foreign Service (Rtd) Chief Information Commissioner, Mizoram Information Commission office ah lawmman hlanna hun hman a ni. He competition hi Aizawl khaw chhunga University leh College naupang, an course a Right to Information nei te tan bik a buatsaih a ni.

Pu Lal Dingliana chuan RTI Act chungchanga Essay Competition buatsaih vawi khatna tluang taka neih a ni leh hlutpui a hlawh na ah lawmthu sawiin RTI hi Mizoram ah kum 2006 atang chauh a hman tan a niin tunah kum sawm dawn lai a lo ni ve tawh a, mite pawh in a awmzia hre tan in hman tangkai ani chho ta zel a, Mizoram ah ringawt pawh he dan hmangtu te hlawhtlinna hmuh tur a awm tawh in miten RTI hi tu ta bik mah nilovin India khua leh tui te chanvo anih hi hrethiam tawh in thu dik hriat nan an hmang tawh a ni a ti a. Sorkar nen tang ho in RTI chungchang hrilhfiah na ‘Awareness Campaign’ Mizoram hmun hrang hranga neih anih bak ah ATI ah te pawh zirlai pakhat anga telh anih avangin miten an chhawr tangkai tawh hle a, Chanchinbu thenkhat te pawhin thudik hriat nan an hmang a, langtlang sorkar siamna atana thil pawimawh tak a ni a ti bawk. Chutih laiin mithenkhat te erawh chuan a kalphung man chiang lovin mi chhiatna leh fel lohna hailan tum nan hrim hrim hman an tum thei a, ram kalphung, society leh hlemhletna diklo te siamthat nana hman chi a nih thu a sawi bawk.

Mizoramah RTI dan hman anih atanga chhui dan in Sorkar Office leh pawl hrang hrang ah te hnathawh dan uluk chhoh a niin mite chetphung ah pawh fimkhur taka document te neih thlap chin a lo ni chho ta chu lawmawm a tih thu sawiin Chief Information Commissioner Pu Lal Dingliana chuan RTI dana zawh kher ngai lo hian Sorkar department leh pawl hrang hrang te hian kan nihna hi chiang taka tarlan ngam hi a tul tawh a ni tiin RTI hmasawnna turin mi zawng zawng hi kan tanrual a ngai a ni a ti a. Essay Competition an buatsaihah zirlaite an hun chep tak kara thu tha leh tangkai tak hmanga an tel theih na ah lawmthu a sawi bawk a ni.

Pu L. Hrangnawna , Indian Police Service (Rtd), Information Commissioner chuan Mizoramah RTI Act chu hlemhletna vengtu tha tak anih avangin corruption te, diklo taka thil tih te a kiam tan a, RTI chu kan zavaia ta a ni tiin lawmthu a sawi.

RTI Essay Writing Competition a lawmman dawngtute chu :

1st Prize - Zothansangi Hmar : d/o Rualkhuma Hmar College Veng : LLB (6th Semester) Mizoram Law College - Rs. 5000/- leh Certificate

2nd Prize - H. Laltanpuia s/o H. Lalzarluaia, Chawnpui Veng, Aizawl : B.Com (4th Semester), Govt. Hrangbana College - Rs. 3000/- leh Certificate

3rd Prize - R. Vanlalruata s/o R. Lalmalsawma, New Diakkawn, Kolasib : B.Com (4th Semester), Govt. Hrangbana College - Rs. 2000/- leh Certificate