Vawiin khan Mizoram State Chief Information Commissioner Pu Lal Dingliana pisaah RTI Week hman dan tur an rel.
October 26 atanga 31 chhung hi RTI week niin Pathianni a a tlak avangin a hawnna hun hi Mizoramah chuan October, 27 a neih tur a ni a. A hawnna hun pui ber chu Aizawl, Vanapa Hall-a neih tura ruahman niin hetah hian Chief Minister Pu Lal Thanhawla chu khuallian tura beisei a ni. Inkhawm hi chawhma dar 10:30 ah tan a ni ang.
RTI Week chhung hian District Hqrs. tinah hun hman tur a ni a. Chief Information Commissioner Pu Lal Dingliana chuan Mamitah a hmanpui ang a, Information Commissioner Pu L Hrangnawna chuan Serchhipah a hmanpui ang a, Information & Public Relations Director Pu Jim K.Chozah chuan Kolasibah a hmanpui ve thung ang. District Hqrs dang zawngah chuan DC hovin Information Department te nen hman theuh tura ruahmanna siam a ni bawk.
He week pual hian College leh University a RTI Subject zirna hawng bik zirlaite tan Essay in ziak siak buatsaih a ni ang a, lawmmanah pakhatna Rs. 5,000, pahnihna Rs. 3,000, pathumna Rs. 2,000 a ni ang. He inelna hi hun remchang hmasa berah neih a ni ang. RTI chungchang inzirtirna leh hriatzau nan booklet leh brochure te sem tura ruahmanna siam a ni bawk.
Vawiin meeting ah hian Chief Information Commissioner Pu Lal Dingliana bakah Information Commissioner Pu L. Hrangnawna, I&PR Director Pu Jim K.Chozah leh mi pawimawh dang te an tel a ni.
