Mizoram State Chief Information Commissioner Pu Lal Dingliana, IFS (Rtd) hovin a pisaah sawrkar mi pawimawhten October ni 5 atanga hman tan tur Right to Information (RTI) Week - 2015 hman dan tur an rel.

Pu Lal Dingliana chuan RTI hi mipui zingah inhrilhfiah chhunzawm zel a tulzia leh a bik takin mipui mimir, grassroot level atanga inzirtir a pawimawh thu a sawi a. He dan tha tak hi a tangkai dan leh a hman dan tur kalhmang mipuiin an hriat loh chuan a hlutna a phawkchhuak zo dawn lova. Mipuiin an hman tangkai phawt chuan langtlang sawrkar, mipui sawrkar tha siam tura dan pawimawh ber te zinga mi a ni, CIC chuan a ti. RTI chungchang hi zau zawka inzirtir a nih theih nan Central YMA te nen thawh ho an tum thu CIC hian a sawi lang bawk.

RTI Week hawnna inkhawm pui ber chu Aizawl Vanapa Hall-ah neih ni se tiin meeting chuan a rel a. Hei bakah hian he hapta chhung hian Mizoram hmun hrang hrangah RTI Week hmanna programme neih ni se an ti. Information Commissioner Pu L.Hrangnawna chuan Kolasib-ah a hmanpui ang a, Information Commission Secretary Pu Vanlalngena chuan Thenzawlah, Information & Public Relations Director Pu Jim K.Chozah chuan Chawngte ah hmanpui se tiin an rel.