823/2025-2026

Aizawl, the 11^th June,2025: Vawiin khan Aizawl district pual Green Mizoram Day,2025 observance programme chu District Level Committee on Green Mizoram, Aizawl District bultumin Toofani Hall, 34^th  Assam Rifles Complex, Zokhawsang-ah hman a ni a. Pi Baryl Vanneihsangi, Hon'ble MLA leh Brig. Puspendar Sorayan, DIG & Commander 23-Sector Assam Rifles chuan khuallian leh khualzahawm niin programme an hmanpui. Vawiin Green Mizoram Day,2025 observance programme hi Er. Lalhriatpuia, IAS, Deputy Commissioner leh Chairman District Level Sub-Committee on Green Mizoram, Aizawl District chuan a kaihruai a ni.

Kumin Green Mizoram Day,2025 thupui a tan “Ruahtui khawinan thing I phun uar ang u/ Plant trees and  catch the rain" hman a ni a.

Vawiin programme-a khuallian Pi Baryl Vanneihsangi chuan thusawiin, a kum telin tui kan harsa tulh tulh a, a thlawna kan dawn ruahtui khawlah tan kan lak nasat a ngai. Ruahtui khawlna tha ber chu ramngaw hi a ni a, Kan ramngaw neih sa te hi tihchereu lovin humhalh tha i la, thing hi i phun belh uar zual zel ang u. Kan thing phunna hmun erawh thlang thiam i la, leimin  thlentu leh electric hrui tana hnawksak a ni thei dawn em? tih te ngaituah chungin kan thing phunna hmun tur i thlang uluk  ang u. Kan phun tawh enkawl zui kawngah pawh tan i la zual zel ang u, tiin kalkhawm te a sawm.

Khualzahawm Brig. Puspendar Sorayan pawhin thu sawiin, Green Mizoram Day puala  Zokhawsanga  thingtiak 1000  phun tur a ni chu lawmawm a tih thu leh 23- sector Assam Rifles ten thingtiak phun te chu duat taka an enkawl zui tur thu a sawi. Mizoram sawrkarin  a ram leh mipui te tana a hmalakna reng rengah, 23-Sector Assam Rifles chuan puibawm tura an inpeih reng thu a tarlang bawk.

Pu Lalnunsanga Khawihring, IFS, DFO & Member Secretary, District Level Sub-Committee on Green Mizoram chuan technical report pein, report a tarlan danin kum 1999 atanga kum 2024,(Kum 26 chhung) hian Green Mizoram Day pual hian thingtiak 29,08,706 semchhuah tawh niin,  17,71,632 phun tawh a ni bawk.

Vawiin programme-ah hian Ramhlun South YMA Zalpawl te  atangin Ceremonial song ngaihthlak niin,Zirlai naupang Lalawmpuii, Don Bosco School, Mission Veng atangin  Awareness  changvawn ngaihthlak a ni  a. Pu K. Lalmuansanga, President, ASEP hnen atangin Awareness Campaign thuchah ngaihthlak a ni bawk.

Vawiin programme-ah hian  Aizawl district huam chhunga Kangmei laka an khaw  ramngaw humhalh tha 3 te hnenah  “Village Level Fire Preventioin Award,2025”  semchhuah nghal a ni a.

Lawmman dawngtu te chu:

1^st Prize----N.Serzawl

2^nd Prize----Thiak

3^rd Prize----Lungsum

Lawmman hian Chawimawina thuziak leh tangka fai ₹50,000, ₹30,000 leh ₹20,000 a keng tel a ni.

Pu Rex Zarzoliana Vanchhawng, SP, Aizawl chuan vote of thanks hmangin vawiin Green Mizoram Day Observance programme hi a khar ta a ni.

Observance programme hman zawhah hian Khuallian, khualzahawm leh official ten ‘ceremonial planting’ hun hmangzui nghalin, Toofani Hall complex-ah thingtiak pakhat (Herhse, Mesua Ferrea) theuh an phun a.  Vawiinah hian thingphun hnatlang neih zuia Zokhawsangah hian thingtiak 1000 vel phun tum a ni.