1390/2024-2025

Aizawl, the 31st of July, 2024: Excise & Narcotics Minister Pu Lalnghinglova Hmar chuan vawiin khan Guwahati-ah Assam sorkar Excise Department hnuaia mi pawimawhte ruihhlo do chungchang a sawipui a, indawr zui zel bakah hmalak zel dan turte an rel.

Pu Lalnghinglova Hmar hi Assam Excise Minister Pu Keshab Mahanta nen vawiina inkawm turin ruahmanna siam a ni a. Assam Minister hi tul bik thil vanga a remchan loh thut avangin phone kaltlanga inbiain hmalak dan turte an sawi dun a. Pu Lalnghinglova Hmar in State pahnih harsatna tawh mek chungchangah uluk zawka inbiakna neih tha a tih thu a hrilh chu Assam Minister pawhin tha a ti a; Excise Department chauh ni lo Home Department aiawhte nen pawh sawihoa tanlak a tul thute an sawi dun a ni.

Assam Excise Minister ruahman angin Assam sorkara Excise Department Secretary Pu Indreswar Kalita, IAS leh Commissioner of Excise Pu Jitu Doley, IRS te nen ruihhlo do kawnga State pahnihte thawhho dan sawihoin inkawmna hun tha tak an nei zui bawk.

Pu Lalnghinglova Hmar chuan Myanmar atanga Heroine no. 4 lokal chu Assam huamchhungah siam danglamin 'Bagha Cap' ti a vuahin Mizoramah a lo luh leh thin thute, damdawi hman sual chi an tawlh luh thin dante leh Assam chhunga khaw thenkhatah ruihhlo zuarte an zalen hle ni a Mizoram atanga hriat a nih thute Assam Excise Department hotute hi a hrilh a ni.

Assam Excise Department hotute chuan Mizoram Excise Minister thusawite chu chhinchhiahin an bawhzui tur thu an sawi a. Hun remchang hmasa berah an Minister hova sawi hova an zirchian tur thu leh, Mizoram Minister rawtna anga state pahnihte ruihho do kawnga inkawm leh thuai tha an tih thute an sawi a ni.