589/2025-2026

Dated Aizawl the 26th May, 2025 : Vawiin chawhnu khan Social Welfare, Women & Child Development Minister Pi Lalrinpuii hovin ruihhlo leh a kaihhnawih chungchanga hmalak zel dan tur inrawnkhawmna meeting Aijal Club-ah neih a ni a. He hunah hian Nasha Mukh Bharat Abhiyaan (NMBA) hnuaia hmalaknate, Ruihhlo do kawnga hmalak dante leh Interntional Day Against Drug Abuse and Illicit Trafficking hman dan turte bakah pawimawh dangte an sawi ho a ni.

He hunah hian Minister Pi Lalrinpuii chuan ruihhlo do kawngah theihtawp chhuaha hmalak a tul takzet thu leh hmalakna thar neih a tul thu sawiin, demand reduction, supply reduction leh harm reduction-ahte beihpui thlak a tul thu a sawi a. Ruihhlo do kawnga hmalatu hrang hrangte inkarah hnathawh inhriatpui tawn leh intanpui tawnte a tul thu sawiin, mahni hmazawn theuahah tangkai zawka kan thawh a pawimawh a ni, a ti a. Minister chuan Social Welfare Department hnuai hmalakna hrang hrangte tarlangin, ruihhlo chungchanga hriattur pawimawhte inzirtirna awareness campaign kalpui thin a nih thu leh Mizoram Social Defence & Rehabilitation Board kaltlangin ruihhlo ngai enkawltute, NGO te, Line Department thawktute training pek thin a nih thu a sawi a. Nasha Mukt Bharat Abhiyaan (NMBA) hnuaiah District tinah Deputy Commissioner kaihhruainain District Committee din a nih thu leh ruihhlo la ti lote venhimna atan kawng hrang hranga hmalak a nih thu tarlangin, District tinah Master Vounteer 50 zel awmin Mizoram puma Master Volunteer 550 te training pek vek an nih tawh thu a sawi bawk.

Minister chuan ruihhlo ngaite’n dam hlenna an chan theih nana pawimawh tak pakhat chu Aftercare treatment a nih thu sawiin, hemi atan hian Jordan Centre, Sethawn chu After-Care Centre leh De-Addiction & Rehabilitation Centre atana hman tura duan a nih thu leh ruahmanna thehluh a nih thu a sawi a. Hei hi ruihhlo nghei rei tawhte leh rehabilitation programme paltlang tawhte enkawlna tur a ni a, Presbyterian leh Baptist Kohhran lam pawh dawr niin, an inhuamna kan ngaichang mek a ni, a ti a. Centre Accreditation Rules siamrem ngai pawh buaipui mek a nih thu sawiin, kan thawk mek, rei lo teah peih fel tum a nih thu a sawi a. State Drug Policy kan neih theih nan hma lak chhoh tan a nih thu a sawi a. Law Enforcement Agency-te leh tlawmngai pawl ten theihtawp an chuah chung pawha ruihhlo hman a hluar zel chu veiawm a tih thu sawiin, Centre hrang hranga Medical service kalpui dante, detoxification leh craving (ruihhlo chakna) tih ziaawm dan turahte ruahmanna leh hmalakna thar kan neih a tul thu a sawi bawk.

Social Welfare Director Dr. Lalhriatzuali chuan ruihhlo lengvel leh mamawhna titlem tura Sorkar in NMBA, Ruihhlo Do leh adangte kaltlanga hmalak dan a sawi a; International Day Against Substance Abuse and Illicit Trafficking (26th June) hman dan tura ruahmanna lo siam tawhte chhawpchhuak in, he ni hi department hrang hrang leh pawl, kohhran leh mipui inkara thawhhona tha a awm theihnan te, sawihona neihte, hmathlir rel nan te hman tangkai hle a ni a ti a. Hemi atan hian State Level Organizing Committee in district tinah department hrang hrang leh zirlai leh thalai te huam tel a liantham takin june ni 1 atangin ni 26, 2025 thleng hman dan tura an ruahman te thlirho a ni.

Meeting ah hian Ruihhlo ngaite enkawlna hmunpui Drug Treatment Centre din tur te tan Accreditation pek a tul tur sawi a ni bawk a. Heng hmunah te hian enkawlna mumal tak, science zirchianna zuilzuia kalpuia, hriselna lam bakah dan leh mihring dikna chanvo hum chunga kalpui a nih theih nan leh, centre hrang hranga inenkawlna inang tlang kalpui a nih theih nan State Level Accreditation Committee chu Excuse, Social Welfare, MSD&RB leh kohhran leh tlawmngai pawl hrang hrangte member niin din a nih thu Director hian a tarlang a ni.

He meeting ah hian district tin DC leh DC aiawhten an district theuha NMBA hnuaia ruihhlo do kawnga an hmalakna leh harsatna an tawhte an tarlang a. District tinah social media, concert leh sports hmangin awareness campaign nasa taka kalpui ani a, thalai leh students te zingah ruihhlo ti lo tura thutiam (pledge) lakna te, school leh college hrang hrang ah Anti-drugs club din a nih thu te leh zirtirtute pawh training pek an nih thu te an sawi ani.

SWWC Department lamin a hriat theih chinah tun dinhmunah hian Ruihhlo ngai enkawlna Home Mizoram-ah 44 a awm mek a, heng zingah hian Kohhran Centre 8 awmin, Sorkarin Social Welfare Department kaltlanga a din Centre 2 awm a, a bak zawng chu mimal leh tlawmngai pawl din a ni a, heng Centre-a thawktute pual hian level hrang hrangah training buatsaih thin a ni a. Central Sorkarin a hriatpui, IRCA Center-te a bik taka vil leh an hnathawh enpuia, an mamawhna zawnah zirtirna leh kaihhruaina pek an ni.

He hunah hian Pu Lalnunhlua, Addl. Secretary, Social Welfare, Women & Child Development chu moderator a ni a. SWWCD Joint Secretary Pi Zonunthari kaihhruaiin sawihona neih a ni a. District hrang hrang DC leh an aiawhte, department aiawhte leh tlawmngai pawl aiawhte an tel a ni.