1164/204-2025

Aizawl dated 12th July, 2024: Vawiin chawhma khan 'Helen Lowry College 3rd Graduation Programme' chu Helen Lowry Auditorium, Seven Day tlang a neih chu Prof. Lalnilawma, Minister, Rural Development Department chuan khuallian niin a hmanpui a. Pastor Dr. Biakzidinga Renthlei, President, Mizo Conference of Seventh-day Adventist chu khual zahawm niin Pu James Lalhruaitluanga Chhakchhuak, Principal, Helen Lowry College chuan College report a pe a ni.

Khuallian Prof. Lalnilawma, Minister, Rural Development Department chuan mihring dam chhunga ni pawimawh anga kan chhiar tlemte zingah zirnaa kan hlawhtlinna lawmna ni, 'Graduation day’ chu a tel thu sawiin zirlaiten hma lam hun eng tak nei chunga hmasawnna kawng an zawh zel theih nana kawng inhawnna ni a nih bawk thu a sawi a. Taimakna leh thawhrimna nen zirna in sang  paltlang a, graduate an nih tawh angin an zir thiam tawhte chu, faina kawngahte, mahni invawn leh inthunun theihna kawngahte tilang chhuak fo turin zirlaite chu a chah a ni.

RD Minister chuan zirlai hlawhtling, graduate tawh te chu mahni inrintawkna khawp thiamna nei tawh tur a beisei an nih angin zahawm tak a nun invawng turin leh mahni a eizawnna pawh inhaikaw thei tawh tur a beisei an nih thu a sawi a. New Education Policy 2020-ina kalphung a duan angin graduate tawh te chu an mahni zir subject an thiam hle tur a beisei a nih thu te, thil thar ngaihtuah chhuak thei tur a rilru seng thiam turte, a tul hun ah ‘Leadership quality’ lan chhuah tir thei tur an nih thu a sawi a. Ruihhlo chu hmasawnna tikhawtlaitu leh tithuanawptu a nih angin ruihhlo lak a fihlim tlat turin zirlaite chu a chah a, an hlawhtlinna a lawmpui thu sawiin an kal zelna tur ah duhsakna a hlan a ni.

Khual zahawm Pastor Dr. Biakzidinga Renthlei, President, Mizo Conference of Seventh – day Adventist chuan Helen Lowry College 3rd Graduation programme a zirlai hlawhtlinna chang te chu chhungkua, khawtlang leh India ram khua leh tui tha ni tur a rinawmna leh hmasawn tumna nen hma lam hun zawh turin a chah a. Dr. Jonathan Zodintluanga, Asst. Professor chuan lawmthu sawina hun a hmang bawk a ni.

Helen Lowry College-ah hian Commerce leh Art zirlai 127 an awm mek a, kum 2023-24 khan zirlai 59 exam atangin zirlai 48 chuan hlawhtlinna an chang a ni.