No.3094/2021-2022

Aizawl, 22^nd November, 2021 : Vawiin khan DIRD&PR Conference Hall, Durtlangah Rural Development (RD) Department Minister Pu Lalruatkima hovin Rural Development Department officer ten Department chhunga peng hrang hrangte hnathawh hnathawh thlirletna hun an hmang a. SIRD&PR official website ‘sirdpr.mizoram.gov.in’ bakah SIRD&PR lehkhabu buatsaih pahnih “Thingtlang Tualchhung Sawrkar Thatna Tur Kawng” a tlangzarh nghal a, RD Secretary Pu Zarzosanga pawhin SIRD&PR lehkhabu buatsaih “Sawrkar Hnathawk Puitu” a tlangzarh ve bawk a ni. He review meetingah hian RD Director, RD Joint Secretary, SIRD & PR Director, MzSRLM CEO, DRDA Project Director, Aizawl, SAU Director leh RD Department a senior officer te an tel a ni.

Rural Development Minister Pu Lalruatkima chuan he hunah fuihna thuchah sawiin Rural Development department chuan thingtlang tihhmasawnna tura hmalakna kan ngah em em a, chhungkaw lian tak thlawhma hrang hrang nei ang kan nih avang hian kan hnathawhte sawihona hunk an neih hi a pawimawh a, chak zawka hmalak a nih theih nan a tul anga scheme hrang hranga thawhho theih dan turte pawh hetianga thutkhawmna kan neih hian a hriatthiam theih thin a, a tangkai thin a ni,  a ti a. COVID-19 hripui leng kara RD Department hmalakna chi hrang hrantgte a chhuanawmzia sawiin thingtlang lama kan unaute manganga an awm loh nan kan theih chinah ni 100 inhlawhnatha takin kan kalpui thei a, heng bakah hian RD department hnuaia hmalakna hrang hrang atangin tangkhang lo hawte chhawmdawl hna leh thalaite eizawnna kawng kawhhmuhsak hna hripui leng kara kan kalpui hi a ropui takzet a ni, a ti.

Pu Lalruatkima chuan kan thlen chinah duhtawk mai lovin mipuite chhawr tangkai turin hma kan laka, a theih ang anga hak kan zauh zel a tul tih hre thar zel tura RD officerte chahin, mipuiten min rintawkna hi chhawm nung zel tura theihtawp chhuaha langtlang taka kan kal zel a pawimawh a, heng kan scheme hrang hrangte hi retheihna la kata mipuite khaichhuahna tura tih a nih ang ngeiin, heng scheme te hi a tawp hunah pawha beneficiary te kut benga awm mai lova, mahni intodelh theia an khawchhuah theih ngeina turin tan kan lak a ngai a ni,  a ti a. Hmalakna hrang hranga hlawhtlinna hmel hmuh tur tam tak a awm chu lawmawm a tih thu a sawi bawk a ni.

Vawiin review meetingah hian RD Department hnuaia peng hrang hrang – Administrative Department, Directorate, SIRD & PR and SLMC&IAC, Mizoram State Rural Livelihood Mission leh Social Audit Unit ten an hmalakna, hmachhawp, hlawhtlinna leh thil pawimawh dangte an sawi a, a tul anga zawhna leh chhanna hun hman niin sawihona hun hman a ni bawk a ni. 

Vawiin review meetinga RD Department hmalakna chi hrang hrang tarlan zinga a tlangpui chu hetiang hi a ni :

1.       MGNREGA hnuaiah kumin 2021-2022 kum kal lai mekah Mizoram pumah a chawhrualin ni 67 inhlawhna siam a ni tawh.

2.       SIRD&PR in MGNREGA in khawtlang leh eizawnna (socio-economic impact) a nghawng dan a zirchiannaah (June 2019 – March 2020) MGNREGS beneficiaryte average annual income (kum khata pawisa lakluh chawhrual) chu Rs. 20,479/- a ni a, beneficiary ten kum khata kawng hrang hrang atanga an sum lakluh zawng zawng zinga 13.08% hi MGNREGA hian a do let pha  a ni.

3.       VEC 227 zinga 93.35% leh job card holder interview mi 2079 zinga 73.11% chuan MGNREGS hian an khuaah retheiha a ti tlahniam an ti.

4.       MGNREGS hlawhtling taka kalpui a nih zarah 227 VEC a chhungkaw 8494 (11.56%) chuan MGNREGS vangin eizawnna ngelnghet an nei tih an sawi.

5.       VEC 227 zinga 44.93% chuan MGNREGS vangin an khuaaah tlangram lo neih (shifting cultivation) a tlahniam tih an sawi.

6.       Job Card holder mi 2079 zinga 67.05% chuan MGNREGS hi chhawr tangkaia intunnunna atana an hman thu sawiin, 62.31% chuan MGNREGS a tawp a nih chuan an eizawnna a chhiat theih thu an sawi.

7.       Border Area Development Programme (BADP) hi Mizoram chhunga RD Block 26 zinga RD Block 15 ah kalpui a ni a. Indo-Myanmar border-a RD Block 10 ah (khaw 142 a awm) leh Indo-Bangladesh border-a RD Block 5 (khaw 108) ah kalpui a ni.

8.       Ministry of Home Affairs chuan BADP hnuaia hmalaknate vil zui a awmsdam nan geo-tagging ti vek turin thu a chhuah a, tunah hian RD Block pahnih – Lungsen leh Bunghmunah bul tan niin, BADP khawih RD Block dang zawng pawh tuam chhuah tum a ni.

9.       Watershed Development Project thar PMKSY version 2, kum 2021-2022 atanga kum 2025-2026 chhung (kum 5) kalpui tur sawrkar laipuiin a ruahman thar a, “Springshed Development” a ngai pawmawh dawn, hemi atan hian Project proposal siam mek a ni.

10.   SAGY tluang takin kalpui mek a ni a, Lok Sabha MP leh Rajya Sabha MP ten kum tin model village atan khaw pakhat zel an thlang thin a, hengahte hian sawrkar laipuiin inkaihhruaina a siam dungzuiiin convergence hmanga hnathawh thin a ni.

11.   Kum 1953 a VC dan siam tun thlenga siam danglam hret hreta la hman chhunzawm zel thlakna tur tunlai boruak mil tura duan “The Mizoram Rural Government (Draft) Bill, 2018” sawizauna leh sawifiahna hun hman a ni.

12.   Sawrkar laipui leh online shopping giant “Flipkart” ten MoU an ziah chhawr tangkai turin Mizorama Self-Help Group hrang hrantgte kut chhuak leh thar chhuah chi hrang hrangte tan hmalakna tur ruahman a ni.

13.   India rama Self-Help Group nuai 78 chuang zingah Tipa D-1 VO (Tipa RD Block) leh Gilead SHG, Kawrthah (Zawlnuam RD Block) te chu DAY-NRLM hnuaiah Best Performing Village Organisation leh Best Performing SHG National Award, 2021 hlan an ni.