3630/2024-2025

Khawbung, 3rd December 2024: Vawiin khan Khawbung RD Block chuan an din champhaphak kum 25-na chu BDO Multipurpose Hall-ah an lawm a. He hun hi Rural Development Minister Prof Lalnilawma chuan khuallian niin a hmanpui.

Khuallian Prof. Lalnilawma chuan Khawbung RD Block-in Silver Jubilee an lawm thei chu ropui a tih thu a sawi a. Kum 2000 aṭangin Rural Development kaihhnawih hna hrang hrang a lo thawh tawh ṭhin thu sawiin, heng hun chhung hian sawrkar laipui leh state sawrkar chuan thingtlang mite hmasawnna turin scheme ṭha tak tak a kalpui ṭhin tih a tarlang a. Khawbung RD Block-in kum 25 a lo tlin takah chuan, scheme kalpui tawh te leh scheme kal mek te thlir chungin kan dinhmun leh kan hmabak engtin nge kan kalpui ang tih kan inzawh thar fo a ṭul a ni, a ti.

Prof. Lalnilawma chuan kum 2011 Chhiarpui behchhana in sak ṭanpuina PMAY(G) kalpui mek chu, in leh lo la nei lo, ṭanpuina mamawh tak tak te thlan chhuah an nih theih nan siam rem tum mek a nih thu leh Border Area Development Programme (BADP) chu Vibrant Village Programme (VVP) a thlak a, thiamthil tihpun (skill development) lam te pawh telh chhoh tum a nih thu a tarlang bawk.

Horticulture Minister Prof Lalnilawma chuan sawrkarin hmasawnna ruhrel leh hmunhma a din te neitu rilru pu chunga khawtlang leh mipui ten an enkawl pui a ṭul tih a sawi a. Sawrkar department-te chu hmasawnna hna thawh kawngah an ṭanho thiam a pawimawh thu pawh sawiin, mipui ten eizawnna mumal an neih theihna lam hawi zawnga hmalak thiam a ṭul tih a sawi bawk.

Prof Lalnilawma chuan Khawbung RD Block-in Silver Jubilee hun ropui tak an thlen theihna tura thawktu zawng zawng te zahna chibai bukin, kum 25 dang lo awm leh tur a tan ngaihtuahna thar seng turin a chah a. Khawtlang hruaitu - VC leh VEC kalkhawmte chu BDO lo awm apiang thawhpui thiam turin a ngen a, thawhhona ṭha zawk chuan hmasawnna ṭha zawk a thlen thei a ni, a ti. RD Minister hian Mizoram chhunga RD Block zawng zawng te chu hmasawnna ṭha zawk neih kawngah inelna thianghlim nei turin a chah a. VC te pawh Block chhunga VC dangte nen inelna thianghlim nei ve turin a chah bawk a ni.

Khawbung RD Block hi East Lungdar RD Block hnuaiah kum 1995 June ni 20 khan Additional Block-ah hlankai a ni a. Kum 1999, November ni 26 khan Block puitlingah hlankai niin, vawiin thleng hian Addl Block Development Officer (BDO) 2 leh BDO 16 an awm tawh a ni. Khawbung RD Block hnuaiah hian khaw 25 an awm mek a, BDO hovin Staff 44 ten an enkawl mek a ni.

Khawbung RD Block Silver Jubilee lawmna hun Pu HB Lalnuntluanga chuan a kaihruai a. Pi Lalchhandami Pachuau, BDO chuan kalkhawmte lawmna thu sawiin, Pu Vanlalrova, Joint Director, RD chuan Silver Jubilee puala buatsaih Souvenir a tlangzarh. Pu C. Lalrintluanga, Tuipuiral VC Association President pawhin he hunah hian Khawbung Block hnuaia VC te aiawhin thu a sawi a. Pu Henry Zonunmawiq hnen aṭangin Khawbung RD Block chanchin ngaihthlak a ni a, Pu Varhmingliana Varte, APO-in lawmthu sawiin inkhawm hi a khar a ni.