Vawiin chhun khan YMA Run Haulawngah Saansad Adarsh Gram Yojona Meeting chu Pu CL. Ruala, Member of Parliament (Lok Sabha) hovin neih a ni.
Pu CL. Ruala MP (Lok Sabha) chuan Haulawng khua chu Model Village Mizoram chhunga thlan zingah a pahnihna a ni tih sawiin he Model Village-a hma lak tawh dan leh hmalak leh zel dan tur sawi ho tura Haulawng hmunah ngei Department hotute kohkhawm an ni, a ti. Model Village atan bik hian a hranpaa sum dah a awm hran loh thu leh Rural Development leh Department hrang hrangte thahnemngaihna atanga thawh a nih chuan Model Village tha tak din theih a nih thu a sawi a. Model village ah chuan fainaah, hriselna, thianghlimna leh ei leh barah khawdang tana entawn tlak tur a buatsaih tum a ni, a ti a. Khawtlang leh mimalin kawng hrang hranga hmasawnna an chhawr tangkai theih tura siam a ngai a, chu chu District pum huapa thawhho chuan Model Village tha tak a siam theih dawn a ni tiin khawtlang pawhin neitu rilru pu a khawnuam tak siam thei tura tan la theuh turin a chah bawk a ni.
Pu P.C. Lalthanliana bialtu MLA leh Minister ni bawk pawhin thu sawiin a bial chhung a Haulawng khua Pu C.L. Ruala MP (LS) in Model Village a a thlan avangin lawmthu a sawi a. Haulawng khawchhungah hmasawnna tam tak hmuh tur a lo awm ta a, khawchhung inkalpawhna kawngah te pawh Mizoram ngaihtuahin a tha ber pawl a ni ang a, High Mass te dah a ni a; District Hqrs. in an neih loh NIELIT Centre te dah a ni a ti. Model Village ni tur chuan nun changkang nei tur leh hmasawnnaah sawrkar sum ring mai lovin tih theih kan nei ve a ni tih hria a theihtawp chhuah a ngai a ni a ti bawk.
K. Lalrinzuali, Addl. Secy. RD Department leh State Nodal Officer SAGY chuan SAGY kalphung leh awmzia sawiin Prime Minister zahawm tak Pu Narendra Modi-an Jaya Prakash Narayan pian champha October ni 11 2014 khan a hawng a, he Scheme danglam bikna chu mipui ten an khawtlang mamawhna ang zela hma an lak vena a nih vang a ni, a ti. He Scheme in a tum ber chu khaw awmsa Model village tura Scheme mila siam a ni a ti.
Pu Paul L. Khuma, Under Secretary, RD Department pawhin Power point Presentation hmangin SAGY chuang chang a sawifiah bawk.
Pu CL. Ruala MP hian Haulawng hi Model Village atan July ni 14, 2016 khan a thlang a, ni 21 October 2016 khan hawn a lo ni tawh a ni. Meeting hian Haulawng atana Department hrang hrangin Village Development Plan an lo siam tawh kalpui a nih dan leh an hmachhawpte thlir hoin, hmalak zel dan tur an sawi ho nghal a, meeting-ah hian Charge Officer Project Director DRDA leh Deputy Commissioner Member Convener te bakah line Dept. hrang hrang aiawhte an tel a ni.
