Sansaad Adarsh Gram Yojana (SAGY) hnuaia Lok Sabha MP Pu CL Ruala’n model village atana siam tura a thlan Khawlailung khaw Village Development Plan tihhlawhtlinna pakhat atan Khawlailunga Elementary School (Primary leh Middle School) zirtirtute pual nihnih awh “Powerpoint hman dan inzirtirna” chu vawiin khan DIET Computer Centre, Serchhip ah tan a ni a, Pi Teresy Vanlalhruaii, MCS, DRDA Project Director leh Khawlailung Model Village Charge Officer ni bawk chuan he training hawnna inkhawm hi a hmanpui.

Pi Teresy chuan zirtirtu kalkhawmte chu SAGY pawimawhzia hrilhfiahin an zirlai naupangte rilru ah zirtirna dik an tuh turin SAGY awmzia an hriatchian a ngai hle a ni a ti a, naupangte rilru sukthlek kaihruaitu ber an nih avangin khua leh tui tha, thu awih leh hman tlak chherchhuah chu an hna pawimawh ber ani tih hre thar leh turin a chah a, naupang ten sikul kai nuam an tih leh an thlakhlelh a pawimawh ber a hetiang tur hian boruak nuam siam an tum tur a ni a ti bawk. Zirtirtute chu an naupang te vil uluk tur leh an harsatna te hriatpui thin tura chah in exam passed tir mai bakah taksa leh rilru ah hmasawnna, hlawhtlinpui tham thiamna an puak chhuah theih nan tan lak a ngai a ni tiin Private School a zirtirtuten hlawh tlem zawk hlawh chung leh naupang tam zawk enkawl chunga exam result tha tak tak an neih theih chuan Sawrkar School a zirtirtu hlawh tam tak la leh zirlai tlem te enkawl zawk te hian result tha lehzual zawk kan neih a ngai a, hei hi kan ti theilo anih chuan kan inenlet a ngai hle a ni a ti bawk.

Thusawitu dang Pu Andrew H Lalremruata, DIPRO pawhin zirtirtute chu khawtlang ah pa rawn an nih thin avangin SAGY kalphung hi hre bel turin a chah a, Village Development Plan hrang hrang duan te chu hmunpui lam atangin an lo thlitfim avangin thil awmzia hrechiang lova anmahni thlangtu MP emaw, Official te leh khawtlang hruaitute sawisel mai a awl thin a, hetiang hunah pawh hian hrilhfiah ngai te hrilhfiah thin turin a chah a, SAGY in a tum ber chu khua leh tui tha, rin tlak ni tura taksa leh rilru hrisel siam anih avangin sum awmlo chung pawhin he hna hi thawh reng theih a ni a ti a, zirtirtute chu zirlaite thinlungah hmasawn tumna thinlung tuh nghet tlat turin a chah bawk ani.

Vawiin Training hawnna inkhawm kaihruaitu Pu Lalrammawia, Principal, DIET, Serchhip chuan Rajya Sabha MP, Pu Ronald Sapa’n Model Village a siam tura a thlan Chhiahtlang khua a Elementary teacher te tan pawh hetiang training hi karleh lamah buatsaih chhunzawm anih tur thu leh hei bakah hian Computer Literacy Mission hnuaiah ruahmanna siam belh zel anih tur thu a sawi bawk.

Vawiina zirtirtu Training tura kal te hi Khawlailunga Primary School leh Middle School zirtirtu 20 an ni a, Pu R. Lalrinawma, Lecturer, DIET in zirtirna hi a pe a ni.