October, 2009 thlaa Aizawla Security chungchanga State Level Meeting-in a lo rel tawh bawhzuiin vawiin chawhma dar 11 khan DC Conference Room ah Saiha Bawrhsap Pu Rodney Lalrinawma hovin Security Meeting neih a ni a, Meeting ah hian kan hma lawka Krismas leh Kumthar hunpui kan thlen tur huna mipui vantlang tan boruak muanawm zawk siam a nih theih nan hmalak dan tur te an rel ho.

 

 

  
Heng Krismas leh Kumthar hunah te halpuah hal vak kan ching thin hi Sorkar chuan tha a ti lo va, mihring hriselna atana a that loh bakah midang tana bengchheng ninawm siamna a tling a, damlo tan phei chuan an tuarna tizualtu a ni thin a ni. Sum leh pai tam tak tul lo taka senralna a nih bawk avangin Mizoram Sorkar chuan halpuah hal hi khap tha a ti a, hei hi District tinah khauh taka kenkawh tur a ni. Saiha District ah pawh Halpuah hal khapna zawm tha zual vengte chu lawmman siamsak an ni dawn a, pakhatna - Rs.10,000 /-, pahnihna - Rs.7,000 /-, pathumna - Rs.5,000 /-, Consolation Prize - Rs.1,000 /- theuhvin panga hnenah pek an ni dawn bawk a ni. He Khapna thupek hi a tihchak nan Kohhran leh tlawmngai pawl (NGO) tin te hnenah uar taka lo puangzar thin tura ngen an ni dawn bawk a ni.
    
Krismas leh Kumthat vuakvet lai hian motor chetsualna pawh a thleng duh hle a, Rui chunga motor chak tak taka khalh te pawh mipui tan a hlauhawm avangin heng huna rui leh buaina siamtu te chu mana, kumthar hma chu bail theih lohva Jail-a tantir ni se, tih te leh motor chi hrang hrang khalhtu te koh khawma hawihhawm, him leh fimkhur zawka motor khalh dan chungchangte inzirtirna neih ni se tih te Meeting chuan a rel a, khawlaia motor tlan endik turin Mobile Court te pawh buatsaih an rel bawk. Heng kawng hrang hranga hmalakna te hi a lo hlawhtlin lehzual nan sorkar chuan mi zawng zawng tawiawmna a ngen tak meuh meuh a ni.