April ni 16-a Mizoram-a Member of Parliament (Lok Sabha) inthlanna kan neih tura 39-Saiha (ST) A.C.-a duty tur Presiding Officer leh First Polling Officer te tan Election Training thawhkhatna chu vawiin chawhma dar 10:30 khan D.C.’s Conference Hall ah neih a ni a. District Election Officer leh Saiha DC ni bawk Pu Rodney Lalrinawma’ n hmanpuin training tura kalkhawm mi 120 te chu tun atang chuan Election Commission hnuaia thawk an nih hria a an mawhphurhna pawimawhzia hre reng turin a chah. Nikum kum tawp lawka MLA inthlan felfai leh tha taka kan neih theihna chu anmahni thawhrah a ni tiin lawmthu a hrilh a, felfai lo lai tlem awm te chu tih bo a nih theih nan leh engmah tihsual palh awm lo tur khawpa an mawhphurhnate bel taka an kenkawh theih nan ngun tak leh uluk taka zir turin a ngen a, hriatchian loh lai an neih apiang te chu Training chhunga inzawtfiah zel turin a chah bawk.

 

 

Vawiina Election Training hi Addl. D.C. Pu Zorammuana’n a kaihruai a, inthlanna tluang taka a kal theihna chu a buaipuitu duty turte ah a innghat a ni, tiin Election Commission thikthu chhiatzia hre reng turin a chah a, hriatchian loh leh zawhfiah duh an neih apiang te chu Election Officials te hnenah engtik lai pawha zawhfiah theih reng a nih thu te a hriattir a ni. Training ah hian Addl. D.C. chuan duty turte hriat tur hrang hrang, tih tur leh tih loh tur te leh Polling Booth buatsaih dante a sawifiah a. Election Officer Pu H. Lalhmingthanga leh District Research Officer Pu K.Thankhuma ten Form chi hrang hrang chungchang an sawifiah bawk a, ADC (P) Pi Marilyn Rualzakhumthangi’ n EVM chungchang a sawifiah bawk, Inthlan hmasaa harsatna an tawhte sawihovin tha zawka inthlan buaipui a nih theih dan turte a an ngaihtuah zui bawk a ni.

EVM Randomization First Stage chu nimin tlai khan Political Party aiawhte hriatpuiin neih a ni tawh bawk a. 39-Saiha (ST) A.C. tana Election Training thawh hnihna chu ni 7.4.2009 hian neih a ni leh ang a, 40-Palak (ST) A.C. tan ni 4.4.2009 leh ni 9.4.2009 ah Training hi buatsaih a ni ve thung ang.