Nimin chawhma dar 11 khan District Disaster Management Committee bultuma buatsaih ‘Chhiatrupna lo thleng thei laka chet lak dan zirhona’ Mock Drill chu Government Higher Secondary School Complex, Saiha ah hlawhtling taka neih a ni. He mock drill ah hian lirnghing na tak Richer Scale 6.1 lothlengin chhiatna rapthlak tak a thlen theih dan entir a ni. Chawhma dar 11:00 khan Lirnghing natakin Saiha khawpui chu sawi-in, inkalpawhna kawng, electric leh inbiakpawhna zawng zawng a tihchhiat vek avangin MPRO Saiha te chuan District Bawrhsap chu an hriattir nghal a, a ni chuan chhanchhuaktu pawl leh tlawmngai pawl hrang hrangte hriattirin kangmei chhuak mai thei laka invennan Fire Department leh Security Police-te pawh a hriattir nghal a. Lirnghing in a tihchhiat nasat ber building Govt. Higher Secondary School zirlai naupangte chhanchhuak turin chhanchhuaktu pawl Search & Rescue Team te pawh hriattir nghal an ni bawk. School naupangte building chim remrum kara thi leh hliamte chu fimkhur leh uluk takin chhanchhuah hna an thawk nghal a. Damdawiin hnai ber Civil Hospital, Saiha-ah bawisawm tura panpui nghal an ni. Department-a thawkte chuan theih tawp chhuahin an lo bawisawm a, he lirnghingin kangmei a tih chhuah avanga inkang pawh Fire department ten rang takin an thelh mit nghal a ni. He Mock Drill hi chhiatrupna lothlen thut pawha mipuite chiai mai lova chhanchhuah hna chak zawka thawh a nih theih nana hmalak dan zirtirna a ni.

He Mock Drill neih zawh hnu hian mawhphurhna hrang hrang latute chuan Govt. Higher Secondary school-ah Review Meeting an nei zui nghal a, he meeting-ah hian Pu Zorammuana, Additional Deputy Commissioner chuan mawhphurhna hrang hrang changtute hnenah tluang tak leh fel taka an mawhphurhna an hlen chhuah avangin lawmthu a sawi a. Mock Drill hi hmun khatah mai nilo veng hrang hrang a neih thin a pawimawh thu a sawi bawk a ni. Mock Drill neih leh huna hmasawnna tur kawng hrang hrangte a sawilang bawk, mawhphurhna hrang hrang neiten hmasawn ngai an neihte huamzau takin sawihona an nei zui nghal bawk a ni.