Vawiin chawhma dar 10:30 khan Deputy Commissioner, Saiha Office Chamber-ah Swine Flu (H1N1) chungchang ngaihtuahin meeting neih a ni. He meeting-ah hian tunlai natna hrileng lar tak Swine Flu laka mipuite him theihna turin engtia hmalak tur nge tih ngaihtuah a ni a, mipuite chu chiai mai lo tur leh he natna vei ni a in ringhlelte chuan Civil Hospital, Saiha-ah a rang thei ang bera in hriattir nghal tur a ni. He natna vei an lo awm palh thut pawha a enkawltute inthuamna tur famkim pawh Saiha Civil Hospital-ah hian a awm kim vek a ni, natna lo lanchhuah dan hi Category A, B leh C ah te then a ni a, Category A leh B te hi chu hlauhawm lutuk lo leh dam mai thei an ni a. Category C erawh hi chu enfiah ngai a ni thung. He natna hrileng vang hian Chief Medical Officer Saiha ruahmanna in local cable TV ah te Doctor te nen interview neih thuai tura rel a ni.

He natna lanchhuah dan tlangpui chu thawhah, awmna, mutchhuak, BP hniam, chil emaw khak emaw thi nena inpawlh, tin hmawr dum, naupang thinchhe thar thutte a ni a. A natna a lo zual zel chuan damdawiin panpui vat tur a ni. He Swine Flu enkawlna tur hian CMO Saiha chuan room pakhat ruahman nghalin he natna chungchanga zawhfiah duh neite chuan DMS Saiha telephone no. 224056 leh IDSP Saiha phone no 222913 ah te zawhfiah theih reng a ni. He natna do tur hian Saiha District chhungah Rapid Response Team din nghal a ni. Hmun dang atanga ran lakluh chang pawh khauh zawka khuahkhirh nise tih rel tel a ni a. Ran talhtu reng rengin district AH & Vety department atanga ran hrisel a ni tih lanna certificate felfai tak an neih loh chuan ran talh phal a ni dawn lo a ni.