Nizan dar 10 vel khan Saiha Bazar-ah kangmei nasa tak chhuakin, he kangmei chhuak avang hian In 29 leh a luahtu chhungkaw 49 te thil neih leh bungruate chu engmah chuh hman lovin a kang fai vek.

He kangmei chhuahna hi Saiha khaw lun lai tak Bazar hnuai a ni. He kangmei chhuak avang hian Saiha bialtu Pu S. Hiato chuan Chief Minister Pu Lal Thanhawla hmu nghalin Chief Minister ho hian Finance Minister Pu H. Liansailova; UD&PA Minister Pu Zodintluanga; Disaster Minister Pu N.K. Chakma leh Chief Secretary Pu Vanhela Pachuau leh MADC, CEM Pu S. Khipo ten chhawmdawlna awm thei ang anga tanpui turin meeting an nei nghal a ni. Chief Minister Pu Lal Thanhawla’m chhiat tawkte dinhmun hriatthiam pui a, a tul ang anga chhawmdawlna pek a tum avangin bialtu Minister Pu S. Hiato chuan Saiha mipuite aiawhin lawmthu a sawi a, mipuite harsatna hrethiamtu Chief Minister Pu Lal Thanhawla kan nei chu a vanneihthlak a ti hle.

Saiha Bazar kangmei chhuak avang hian Minister Pu S. Hiato leh Pu Zodintluanga, UD&PA Minister te chuan vawiin 2.2.2012 hian Aizawl chhuahsanin Saiha an pan nghal a ni.