1564/2024-2025

Saitual the 13th August, 2024: Vawiin khan Saitual district-ah India ramin zalenna a hmuh lawmna champha pual “Har Ghar Tiranga” chu District Bawrhsap Dr. Lalngura Tlau kaihhruaina hnuaia neih a ni a, Independence Day lawmnaa parade contingent turte chuan India hnam puanzar kenga kawng zawhna hun “Tiranga Yatra” leh “Har Ghar Tiranga Pledge” chham rualna hun an hmang a ni.

Saituala Govt. Middle school I & II, Govt. High School, Govt. Higher Secondary School, Presbyterian English School leh Govt. Saitual College atanga Parade contingent turte hian C.I kawn, Saitual Chhim Veng atanga Keifang Centenary Sports Complex thleng hnam puanzar kengin kawng an zawh a. Kawng zawh tawpah hian "India ram puanzar zar a, kan ram tana zalenna sualtute leh mi huaisente zah tak chungin, keimah ngei pawh India ram ṭhan nan leh hmasawnna hna thawk turin ka intiam e," tiin Tiranga Pledge an tiam rual nghal a ni. 

He hunah hian District Bawrhsap Dr. Lalngura Tlau bakah Pi Chhuanhlupuii, Sub-Divisional Education Officer, Saitual, Dr. VLK Dawngkima, Assistant professor, Govt. Saitual College leh school hrang hranga zirtirtute an tel a ni.  

Tiranga Yatra hi Har Ghar Tiranga puala buatsaih niin India ram pumah August ni 11 atanga ni 13 inkarah ram mipuite inpumkhatna leh Hnam puanzar zahna lantir nan buatsaih a ni a, mipui thinlungah ram leh hnam hmangaihna tuh thar leha a awm theih nan leh zalenna sual chhuaktute hriat reng nana buatsaih a ni. 

Har Ghar Tiranga Campaign chu Azadi Ka Amrit Mahotsav hnuaiah mahni in theuhah Hnam puanzar zar a, mipui rilru-ah Hnam puanzar ngaihhlutna a awm leh theih nana beihpui thlakna a ni a, mipuiten hnam rilru kan put a, ram leh hnam tan phur taka thahnemngaihna chawisan zel a nih theih nan August ni 13 atang ni 15 thleng mahni in theuhah Hnam puanzar zar theuh tura infuihna a ni. Mipuite chu #HarGharTiranga tiin thlalak leh selfie te social media platform hrang hrangah upload theuh tura sawm kan ni.