2191/2023-2024

Dated Saitual the 6th October 2023: He DC office building hawnna a Khuallian Pu R Lalzirliana, Hon'ble Minister P&E, Art & Culture etc chuan Saitual DC office building hawn a ni thei chu a thinlung takin a lawm a ni, a ti a, DC office sak anih theih nana hma latu Chief Minister chungah a lawmthu a sawi a, sawrkar hotute, PWD, Finance, contractor leh a kalkawng a khaihlak awm lova thawktu zawng zawng te hnenah lawmthu a sawi bawk.

Minister Pu R Lalzirliana chuan Saitual DC office building thar hawn chu ama mimal ngei ah pawh hun rei tawh tak District a lo din theih nan a theihtawp a lo chhuah tawh leh vahvaih pui tawh a nih avangin a thinlung chhungril tak in a lawm a ni, a ti a. Saitual chu District capital ni mai lova khawpui lian a nih theih nan kawng hrang hrang in a hun chhung in hmalakna kalpui a ni, a ti . Saichal kawng laih a nih avangin awlsam takin kawlkulh kaltlang ngailo in khaw tamtak atangin Saitual chu kalpawh theih a ni ta a, tui pawh hnianghniar taka a awm theih nan Tuivawl atangin pump chhoh a ni, a ti. Tribal girls hostel te, boys and girls hostel, District Jail building te leh small shopping center te chuan nasa takin khawpui a ti thang in a ti changtlung a ni, a ti bawk.

Pu R Lalzirliana chuan Saitual District a nih theih theih nana an thiltih zawng zawng te chu thil tangkai tak tak ni zui ta zel an ni, a ti a. DC office a thawktu zawng zawng te hnenah chuan taima leh rinawm taka thawk a mi dangte tan malsawmna ni turin duhsakna a hlan a ni.

Dr Lalngura Tlau, Deputy commissioner Saitual pawh in thu sawiin, DC office building hawn anih theih nan a sawrkar leh mimal ang pawh a tha leh ngaihtuahna lo seng tawh zawng zawng te chungah a lawmthu a sawi a. Saitual DC office thawktute chungah pawh lawmthu sawiin lungrual leh fel taka hna an thawh thin avangin hnathawh a nuam a, mipuite tan tangkai tak an nih theih phah a ni, a ti. Dr Lalngura Tlau chuan DC office Office hawn chu Saitual tan ni chhinchhiah thlak tak a ni a ti a, DC office chu Saitual mipui te tan a ni tih hria a, neitu thinlung pu a en turin a chah bawk a ni.

Er. Lalremruata, Sr EE, PWD chuan technical report pe in sanctioned amount chu cheng nuai 1000 niin, pawisa senral zah chu cheng nuai 1000 a ni. Hna hi April ni 20,2021 ah thawh tan niin zawh hun tur a bituk april ni 20,2024 aia thla ruk a hma, October ni 6, 2023 ah hawn a ni. Ground Floor nen a chhiar tel in chhawng 4 a ni a, a Total floor area hi 2342.56 Sqm a ni. Staff room bakah library, video conferencing room, printing room, conference hall, NIC, canteeen, kitchen, Green room, lift, lobby leh a dang te a awm a ni.

Saitual DC office building hawnna ah hian DC lo ni tawh thin Pu C Lalpeksanga leh Pu V. L Hruaizela Khiangte leh midang ten thu sawiin, Saitual a Department hrang hrang a thawktu te leh sawm bik mi pawimawh te an tel a ni. Hawnna inkhawm hi Pu Lallawmawma, ADC Saitual chuan lawmthu sawina a neih hnu in tihtawp a ni.