2171/2024-2025

Saitual, the 23rd September, 2024: Vawiin chawhma dar 10:30 khan, Saitual Bawrhsap Dr. Lalngura Tlau chuan DC Conference Hall, Saitualah Mission Shakti leh District Level Implementing Committee a hawng.  

He hun kaihruaitu District Bawrhsap chuan hmeichhiate tan kawl eng lo ni tur leh hmasawnna rahbi thar lo ni turin Mission Shakti leh District Level Implementing Committee (DIC) chu a hawng a ni tih a sawi a, tanpui ngaite tanpuitu leh Saitual District chhunga hmeichhiate chawikanna a lo nih ngei a beisei thu a sawi.   

He hawnna thutkhawmah hian Pi Lalrammawii Kawilam, Nodal Officer on Samarthya chuan District Hub for Empowerment (DHEW) awmzia leh thil tumte a sawifiah a, Mission Shakti hnuaia hmeichhe tana Scheme awm zawng zawng khaikhawmtu a ni, a ti. Hmeichhiate hleihlenna laka humhimna leh kawng hrang hranga an hmasawnna leh chawikanna tura din a ni tih a sawi bawk. Pi Flora Laltanpuii, Deputy Director (Women) and Nodal Officer on Sambal chuan Hmeichhiate humhimna - need for safety and security of women chungchang a sawi a,  Women helpline 181 hmanga mi tam tak chhanchhuah an ni tawh tih tarlangin, One Stop Centre-  hmeichhe hleihlenna tuarte enkawlna hmunte a sawifiah a, thlatin enkawl lai mi engemaw zat an awm thin tih a sawi.  

Pi Jessica Hauzel, Child Development Officer, chuan Mission Shakti staff-te inhmelhriattirna hun a hmang a, Dr. Lalhruaitluangi Chhangte, District Programme Officer chuan Mission Shakti chungchang sawifiahin, Mission Shakti hnuaiah chuan sub scheme pahnih a awm a, chungte chu- Samarthya (hmeichhe chawikanna) leh Sambal (hmeichhe humhimna) te an ni, a ti. Pi Mary Malsawmkimi, District Mission Coordinator, DHEW chuan kum khat atana an hmachhawp- Annual Action Plan 2024-2025 on Mission Shakti sawi zauna hun a hmang nghal a. He hun hi Committee Chairman Dr. Lalngura Tlau chuan lawmthu sawinain a khar a ni.   

District Level Implementing Committee (DLIC) on Mission Shakti chu District Hub for Empowerment (DHEW), Women and Child Development hnuaia din a ni a, Chairman hi District Bawrhsap niin District Programme Officer (WCD) chu convener a ni. Member-te chu Superintendent of Police, Project Director, DRDO, Chief Medical Officer, District Education Officer, District Information and Public Relations Officer, District Medical Superintendent leh Branch Manager (for Jan Dhan) MRB te an ni.