297/2025-2026

Saitual, the 23rd April, 2025: Vawiin khan DC Chamber, Saitualah, District Bawrhsap Dr. Lalngura Tlau chuan Mizoram Larsap General (Dr) Vijay Kumar Singh atanga fahrah leh chhawmdawl ngaite tana tanpuina cheng 10,000 chu Lt. Vl. Chhanchhuahi, Superintendent, Hlimna In Girls Home, Saitual hnenah a hlan.  

He hunah hian Bawrhsap Dr. Lalngura Tlau chuan thu sawiin, Salvation Army te chu an hnathawh a ropuiin, mi tam tak tan malsawmna thlentu an ni tih a sawi a. Bawrhsap chuan naupangten dikna chanvo tam tak an nei a ni, a ti a, naupang enkawlna home hrang hrang te chu dan hnuaiah a awm tawh avangin Hlimna In Girls Home te pawh sawrkarin a thuam chak zel a beisei thu a sawi. Salvation Army te chu an rawngbawlna chhunzawm zel turin bawrhsap chuan a chah a, midangte tana malsawmna ni zel turin duhsakna a hlan nghal a ni.  

Hlimna In Girls Home Superintendent Lt. Vl Chhanchhuahi chuan Mizoram Larsap leh Saitual Bawrhsap chungah lawmthu sawiin, an rawngbawlna leh hna thawhna kawngah phurna a pek thu a sawi a. Lt. Vl Chhanchhuahi chuan hun rei tak atang tawhin Salvation Army chuan tanpui ngaite tanpuiin, vantlang rawngbawlna an kalpui thin a ni, a ti a. Sawrkarin a theih ang anga a puih thin avangin chak leh zualin hna an thawk theih thin tih sawiin, thawhhona tha tak an neih zel theih a beisei thu a sawi bawk a ni.  

Vawiin hun hmannaah hian Dr. Lalngura Tlau, District Bawrhsap, Lt. Vl. Chhanchhuahi, Superintendent, Hlimna In Girls Home, Pu Lalthakima Chhangte SDO (S), Pu Lalnunpuia, Supdt, Pi Christina Lalnunfeli, SDC leh Pi F. Zodingpuii, DIPRO te an tel a ni.