2212/2025-2026

Saitual, the 14th November, 2025: Vawiin khan Keifang Centenary Sports Complex, Saitual District-ah naupangte ni pualin “Children’s Day Festival 2025” hman a ni a, Pu TBC Lalvenchhunga, MLA, Adviser to Chief Minister (Finance) chu khuallian niin hun a hmanpui.

Vawiin hun hmannaah hian khuallian Pu TBC Lalvenchhunga chuan thu a sawi a, naupangte ni puala hun buatsaih thei a ni chu ropui a tih thu sawiin, district officials te tan rualna vang chauha thleng thei a ni, a ti. Khuallian chuan naupangte ni chu hlimna ni a nih angin himna leh zalenna ni a ni tel tur a ni, a ti a, puitlingte pawhin naupangte enkawlna leh kaihhruaina an dawn theihna kawngah sawrkar hmalakna hrang hrang ngaihvenpui thin turin a chah nghal a ni.

Pu TBC Lalvenchhunga chuan Mizoram sawrkar hnuaiah District Child Protection Unit leh Women & Child Development hnuaia hnathawh pawimawh tak tak te a tarlang a, naupang leh hmeichhiate dikna chanvo humhalh te, zirna lama hma an sawn theih nana puih te leh hleilenna tuarte tanpui hna an thawk mek a ni tih sawiin, an inpekna leh an thawhrimnate chu fakawm a tih thu a sawi. Khuallian chuan November ni 19 hi khawvel pum huapa naupangte hleilenna laka vehimna ni “World Day for the Prevention of Child Abuse” a ni tih a tarlang a, November thla hi dan anga fa lak “Adoption” tih theihna hun tha a ni tih a sawi bawk. Dan anga fa lak hi Mizo ten uar a pawimawh tih sawiin, naupangte tana chhungkaw neihna kawng niin an khawvel thlak danglam theihna a ni bawk, a ti.

Khuallian chuan Saitual District-ah dan anga fa lak mi pahnih an awm tawh tih a tarlang a, DCPU hnuaiah naupang sponsorship pek hi 140 awmin, mipa naupang pakhat leh hmeichhe naupang pakhat te chu enkawl lailawk tur chhungkua (foster care) hmuh sak an ni a, after care programme hnuaiah naupang pakhat enkawl a ni bawk. Naupang dan kalha chete enkawlna hmun Observation Home leh naupang chanhai leh baihvai enkawlna hmun “home” hrang hrangah naupang engemaw zat enkawl mek an ni tih a tarlang bawk a ni. Khuallian chuan naupangte ni chu hlim leh zalen taka hmang turin kalkhawmte chu a duhsakna a hlan nghal a ni.

Children’s Day Festival 2025 hi District Child Protection Unit (WCD), DC (Office), District Hub for Empowerment of Women (WCD), District Education Office, CMO (Office) leh DMS (Office) te tangho buatsaih a ni a, he hunah hian nilengin naupang infiamna leh intihhlimna chi hrang hrang a thlawn veka hman tur a awm a ni. Naupangte ni denchhen hian Youngest Paraglider pilot in the world nihna hauhtu leh State level under-11 age group cycling championship-a pakhatna ni bawk, Samuel Lalbiakhluia leh State level under-15 age group cycling championship-a pakhatna Isaac Vanlalnunpuia te chu chawimawnna hlan an ni.

Vawiin naupangte ni puala inkhawmah hian Rev. Lalsanglura Sailo, BCM Saitual-in hunserh a hmang a, Pi Lalsiammawii, DCPO in inlawmna thu sawiin, khuallian Pu TBC Lalvenchhunga, MLA leh khual zahawm Saitual Bawrhsap Dr.Lalngura Tlau ten thu an sawi bawk a ni.