2388/2024-2025

Saitual, the 4th October, 2024 : Vawiin khan District Consumer Protection Council, Saitual huaihawtin Consumer Rights Awareness Programme chu DC Conference Hall, Saitualah hman a ni a, he hunah hian District bawrhsap Dr Lalngura Tlau chu khuallian niin hun a hmanpui. Pu Lallunghnema, Chairman, Centre for Connsumer Education, Aizawl chu resource person a ni.

Khuallian Dr Lalngura Tlau chuan kalkhawmte hnenah consumer rights awareness programme an hmang thei chu lawmawm a tih thu sawiin, Saitual district in bung thar an kai a ni, a ti. District nih tawh hnu a hman dan a fuh tawk loh avang leh a body (District protection Council) a awm mumal loh avanga hman a ni thin lo chu pawi a tih thu sawiin, khuallian chuan dan anga huaisen taka kalpui a tum thu leh consumer-te bulah chuan puitling taka kalpui zel a tum thu a sawi bawk. Consumer Protection Act siam a nih dan leh neih anih dante sawiin, Consumer Club 3 din thar anih chu lawmawm a tih thu a sawi bawk. Khuallian chuan mitin hi a field azirin consumer leh service provider kan ni kawp thin a ni, ati a, lei leh hralh kan tih zawng zawng pawh hi consumer hian a huam avangin kan dikna chanvo kan hriat hi a pawimawh em em a ni a ti.

Khuallian chuan bungrua/service Competitive price anga kal/ lei theih a ni thin lo chu a ngaimawh thu leh consumer-te’n an dikna leh chanvo te hre lova pawl hrang hrangten an control thin chu a ngaimawh thute sawiin Consumer ten Consumer rights chu hre tam tur leh ngaihven turin a chah a, hrechiang tur leh zir chiang turin kalkhawmte a chah a, theihtawp chhuah a, hnung tawlh zawng ni lova hmalam pan zel turin a chah bawk.

Pu Lallunghnema, Resource Person pawhin thu sawiin dik lo taka thiltituten mipuiteah harsatna an thlen thin a ni, a ti a. Consumer Protection Act chu ram changkang apiangah an uar a ni, a ti. Resource person chuan consumer-te hi lal an ni a, consumer tel lo chuan dawr an kal thei lova, ram economy pawh consumer-te ah a innghat thuk hle a ni a ti. Medical negligence, deficiency service, access warranty, product liability, mediation tih te chu dan tharah section 74-81na inkarah dah anih thu te a sawi bawk. Tuna Consumer Protection Council hnathawh pawimawh em em mai chu sawirem/palai hna thawh hi a ni a ti.

Vawiin hun hmanah hian Consumer te lungawilohna thlenna tur forum hrang hrang, District, State leh National Commission ah te thlen theih anih thute, heng kawnga harsatna sukiangtu pawimawh tak chu Consumer Union a nih thu te, Legal metrology hnuaia  bukna leh tehna dik hmante, MRP aia sanglova bungraw zawrh leh hralhte, LPG buk dik tak leh phui tha hralh hman/leite, Cement & Iron Rod buk tlinga hralh bakah POL te uluk taka endik thin te leh chumi chungchanga diklo taka ti thinte chunga dan ang hremna/action lak theihna kawng hrang hrangte pawh inhrilh hriat a ni.

Vawiin programme hi  Pu Zairemkima DCSO chuan kaihhruaiin inlawmna thu a sawi a, khuallian District bawrhsap Dr Lalngura Tlau leh Resource person Pu Lallunghnema, Chairman, Centre for Consumer Education, Aizawl te chuan kalkhawmte hnenah thusawiin consumer club thar pathum Govt. Saitual College, Govt Saitual Higher Secondary school leh District Higher Secondary, Keifang te lawmpuina leh Resource person te lawmman hlanna hun hman a ni. He hunah hian District Protection Council memberte bakah All NGO aiawh, khawchhunga dawrlian neite leh retailer-te an tel thei a ni.