1121/2025-2026 

Saitual, the 10th July, 2025: Vawiin khan Excise & Narcotics Station, Saitual District-ah Pu R. Lalruatliana, Excise O/C kaihhruainain tunhnaia damdawi thar ruih nana hman sual khuahkhirh dan tur relin thutkhawmna neih a ni. 

He hunah hian Pu R. Lalruatliana, Excise O/C chuan thu a sawi a, ruihhlo chuan khaw kil khawr ber thlengin min luh chhuah tawh a ni, a ti a, khawtlang hruaitute nen tanghoin theih tawp chhuahin ruihhlo chu an do thin tih a sawi. Excise O/C chuan tun hnaiah nerve tha lo te nachhawkna atana hman thin damdawi pakhat chu ruih nana hmang sual an tam hle a ni, a ti a, he damdawi hi tlawm tea dawra lei theih a nih avangin khuahkhirh a tul hle tih a sawi bawk.  

Excise O/C chuan he damdawi hi dan (act) hrang hrang hnuaiah khuahkhirh a la nih loh avangin, khawtlang hruaitute nen tanghoa do a tul tih a sawi a, khawtlang tangrualin ngenna an siam chuan khuahkhirh theih a nih a beisei thu a sawi bawk

Vawiin thutkhawmah hian Dr. Zothanpari Chhakchhuak, Sr. MO chuan damdawi an hman sual chungchang hi a sawi zau a, he damdawi hi nerve tha lo nei te tana nachhawkna anga hman thin a ni tih sawiin, lu hai leh mutchhuak a thlen theih avangin damlote pawh zan mut dawnah ei turin an hrilh thin a ni, a ti. He damdawi hian mit vai leh lu hai a thlen theih bakah hun rei tak chhung dose sang taka ei chuan thin tha lo thlengin a thlen thei a ni tih a sawi bawk. 

Dr. Zothanpari Chhakchhuak chuan he damdawi ruih nana hmang thin te chuan damdawi dawrah doctor lehkha (prescription) tel loin awlsam takin an lei thin tih a sawi a, Schedule-I hnuaia damdawi khuahkhirh zinga tel tura hma lak mek niin, India Drugs Advisory Board thu chhuah nghah mek a ni, a ti. Schedule-I hnuaia damdawi te hi damdawi dawr pangngaiin an zuar thei lo a, general license nei te chauhin an zawrh theih bakah doctor lehkha (prescription) nen chauh lei theih a ni, a ti. 

Sr. MO chuan Saitual District Hospital-ah CMO office mumal taka kalpui a la nih loh avangin food safety hnuaia drugs inspector te an la awm thei lo tih a sawi a, hei vang hian dan anga hma lak a harsat thin thu a sawi. Tun dinhmunah Saitual District chu Aizawl East-I-in an bial a, Saitual District chu rawn tlawh thuai turin ngenna a thlen thu Sr. MO hian a sawi bawk.

Vawiin thutkhawmah hian kalkhawmte chuan Saitual District chhunga damdawi dawr zawng zawng hnenah he damdawi hi doctor lehkha tel loa pe chhuak lo tura ngenna sem chhuah an rel a, he ngenna hi zawm lo an awm a nih chuan a tul anga hma lak zel te pawh an tum thu an sawiho bawk a ni.

Vawiin thutkhawm hi Pu R. Lalruatliana, Excise O/C chuan a kai hruai a, Dr. Zothanpari Chhakchhuak, Sr. MO chuan damdawi chungchang sawi zauin, Pu J. Rokima, Addl. SP, Pi F. Zodingpuii, DIPRO bakah khawtlang hruaitute leh VC hotute an tel a ni.