944/2026-2027 

Saitual, the 11th June, 2026 : "Thing hi rangkachak anga hlu, Nunna tinreng bul a ni’ tih thupui hmangin vawiin khan Saitual District Level Committee on Green Mizoram Day 2026 bultumin GMD hman a ni. He ni puala inkhawm tawi hi Keifang Venghlun YMA Zawlbukah tukin zing dar 7 khan neih a ni a,  ACF & Member Secretary Pu  Andrew Lalthlamuana'n hun kaihruaiin  Pu Lallawmawma, Addl. DC, Saitual chu khuallian niin hun a hmanpui.  

Khuallian chuan thing pawimawh zia tarlangin mihringte leh nungchate hi tui leh boruak tel lovin kan khawsa thei lo a, tui leh boruak siamtu pawinawh ber leh an innghahna chu thing a nih avangin thing tel lo chuan kan khawsa thei lo tih a chiang viau a ni, ti a. 

Chumi a nih avang chuan thingphun hi sawrkar, khawtlang hruaitu emaw tlawmngai pawl kuta dah chi a ni lo a, mimal, chhungkua ah a pawimawhna kan inzirtir thar atul hle tih a sawi. 

Khuallian chuan ram hmasawnna kal zelah kawngpui leh building tha zawk kan mamawh avangin thing leh mau ten nasa takin a tuar a, chumi ti ziawm tur chuan thingphun hi tha thlah lova kan uar a tul a, a tuartu tur chu keimahni tho kan ni tih a chiang viau tih a sawi bawk. Khuallian chuan kan ram tlawhtu khawvel hmun hrang hrang atangin an thahnem sawt hle a, an rawn hmuh duh chu Aizawl leh khawpui dang ni lovin ram ralmuang, tlang ram hmuh nuam, boruak thianghlim, tiau chhum, ni chhuak leh ni tla nena inchawih em em te hian an rilru a hneh ber thin a, khang phenah khan kan thing leh mau te hi an pawimawh hle a ni a ti a, kan ram rawn tlawhtu te hnen atanga sum lakluh dan kan ngaihtuah thiam te hi a pawimawh hle tih a sawi bawk. 

Pu Lallawmawma chuan vawiina thingphuna hun hmang tur zawng zawngte duhsakna a hlan rualin a enkawl kawngah tha thlah lova puitling ngei tura tan la theuh turin a chah a, Saitual District-a GMD 2026 hmangtu zawng te thawhhopui ah a sawm a ni. 

Hun hmannaah hian District Level Committee on Fire Prevention Saitual District ten kangmei veng tha leh lemziak hmanga intihsiak a buatsaih lawmnan sem chhunzawm a ni a, hengte hi an lawmman an dawn dan a ni.  

Kangmei Veng tha dawngtute:

1st prize Saitual VC - I

2nd prize Vanbawng VC

3rd prize Changzawl YMA  

Lemziak lawmman dawngtute :

1st prize Lalnunthari Govt. PS - II Keifang

2nd Prize Lalnunmawii Saitual High School - II

3rd prize Lalhmingchhuangi Govt PS Keifang

Hun hman zawh hian khuallian Addl. DC Pu Lallawmawma leh SDPO Pu Hmingthansanga ten zawlbuk tualah thingtiak an phun nghal a ni. 

GMD 2026 puala hun hmanna ah hian District Level Committee on Green Mizoram Day 2026 Committee member te leh sawm bik ten hun an hmang a ni.  

Saitual District ah GMD 2026 pual hian Zirna In hrang hrang ten an remchan dan angin thingphun hnatlang an nei  a, Sub Hqrs YMA pawhin an hmun neih Sub Hqrs YMA Rosangi Memorial Park ah thingphun hnatlang an nei a, kum kalta lama kawng dunga thingphun hmunhma tihfai tura mawhphurhna nei ten hun an hmang bawk a ni. GMD 2026 pual hian Saitual Forest Department chuan thing tiak 2700 zet an pe chhuak a ni.